Prézidént donald tramp “Uyghur kishilik hoquq siyasiti qanuni” gha imza qoydi
2020.06.17
Yéqinda amérikaning awam we kéngesh palatalirida birdek mutleq awaz üstünlüki bilen maqullan'ghan “2020-Yilliq Uyghur kishilik hoquq siyasiti qanun layihesi” amérika prézidénti donald trampning ishxanisigha yollap bérilgen idi. 17-Iyun küni chüshtin kéyin donald tramp mezkur qanun layihesige imza qoyup, buning resmiy qanun bolghanliqini jakarlidi.
Aqsaray axbarat ishxanisining shu kündiki melumatida éytilishiche, bu qanun layihesi emdi resmiy qanun'gha aylan'ghan hemde Uyghur diyaridiki zulumgha shérik xitay emeldarlirigha jaza bérish basquchigha ötken. Xewerde “Shinjangdiki ghayet zor kishilik hoquq depsendichilikini eyiblesh mezmun qilin'ghan bu qanun layihesi alahide tilgha élin'ghan bir qisim shexslerge jaza béridu” déyilidu.
Melum bolushiche bu qanun layihesidiki jaza bérilidighan kishiler tizimlikide xitay kompartiyesi merkizi komitéti siyasiy byurosining ezasi chén chüen'goning bolushi zor ijabiy ehmiyetke ige, dep qaralmaqta iken.
Mezkur qanun layihisining resmiy qanun'gha aylan'ghanliqi heqqidiki xewer muhajirettiki Uyghurlarni zor xushalliqqa chömdürdi. Bolupmu xitay hökümitining Uyghur diyaridiki nazaret we muqimliqni téximu kücheytidighanliqi heqqidiki xewerler otturigha chiqiwatqanda bu layihening resmiy qanun'gha aylinishi köp qisim Uyghurlarni xushal qildi.
Amérika xelq'ara diniy erkinlik komitétining komissari nuri türkel bu heqte söz qilip “Prézidént trampning bu qanun layihesige imza qoyushi amérika hemde Uyghurlar üchün untulghusiz bir kün boldi,” dédi.