Уйғур аптоном районида компартийә әзалириниң сани бир йерим милйондин ашқан

Уйғур аптоном районида хитай компартийә әзалириниң омуми сани бир йерим милйондин ашқан. Хитайда чиқидиған “хәлқ тори” ниң хәвәр қилишичә, 2017‏-йилниң ахирлириға қәдәр райондики компартийә әзалириниң сани бир милйон 565 миңға йәткән.

Бу райондики һәр 15 адәмниң бириниң компартийә әзаси икәнликидин дерәк беридикән. “хәлқ тори”ниң хәвиридә уйғур компартийә әзалириниң райондики компартийә әзалири омумий саниниң қанчә пирсәнтини игиләйдиғанлиқи тилға елинмиған. Әмма райондики аталмиш аз санлиқ милләт компартийә әзалириниң 600 миңға йеқинлишидиғанлиқи, бу омуми санниң 38 пирсәнтини тәшкил қилидиғанлиқи илгири сүрүлгән.

“хәлқ тори” ниң қәйт қилишичә, 2017‏-йили компартийә әзалириниң сани алдинқи йилқидин аз кәм 45 миң киши көпийип, 2.96 Пирсәнт артқан. Лекин бу артишни компартийәгә қатнашқан уйғурларниң көпийиши яки районға келип олтурақлашқан хитай көчмән коммунистлириниң кәлтүрүп чиқарғанлиқи мәлум әмәс.

Даириләр йеқинқи йилларда уйғур компартийә әзалириниң никаһ қилиши, һейт намизиға бериши, өлсә намизини чүшүрүши қатарлиқларни чәклигән. Бәзи хәвәрләрдә улар өлсә җәситиниң көйдүрүлидиғанлиқи илгири сүрүлмәктә. Йеқинда чәтәлдики бәзи иҗтимаий таратқуларда даириләрниң уйғур компартийә әзалиридин өлгәндә җәситини көйдүрүш һәққидә тилхәт алғанлиқиға даир учурлар тарқалмақта.

Көзәткүчиләрниң қаришичә, әгәр бу учур тоғра болса бу иш нурғун уйғурларни компартийәгә кириштин бурун кейинликини ойлишип көрүшкә мәҗбурлайдикән. “хәлқ тори” ниң хәвиридә йәнә биңтуәндики компартийә әзалири саниниң 250 миңға йәткәнлики, биңтуәндики аталмиш аз санлиқ милләт компартийә әзалириниң 5 пирсәнтни тәшкил қилидиғанлиқи билдүрүлгән. Көзәткүчиләр, уйғур аптоном райони билән биңтуәндики мутләқ көп санни игиләйдиған коммунист хитайларниң уйғур диярини контрол қилип туруштики асаси таянч күч икәнликини илгири сүрмәктә.