Германийәлик тәтқиқатчилар адидас, пума вә һюго босниң мәһсулатлиридин “шинҗаң пахтиси” ниң изини байқиған

Мухбиримиз әркин
2022.05.06

Германийәлик тәтқиқатчилар адидас, пума, һюго бос қатарлиқ дуняға даңлиқ маркиларниң мәһсулатлирини изотоплуқ анализ қилиш арқилиқ, бу мәһсулатларда “шинҗаң пахтиси” ниң изи барлиқини байқиған. Әнглийәдики “муһапизәтчи” гезитиниң хәвәр қилишичә, германийәниң явропаға даңлиқ агроизоләб тәҗрибәханиси билән хакшоел недеррейн университетидики тәтқиқатчилар пума, һюго бос вә адидас қатарлиқ маркиларниң майкилири үстидин изотоплуқ анализ елип берип, юқириқи нәтиҗигә еришкән.

Хәвәрдә, изотоплуқ анализ нәтиҗиси юқириқи германийә ширкәтлириниң тәминат зәнҗирини йөткәш тоғрисидики вәдилиригә зит болуп чиққанлиқи, һюго босниң ‍өткән йили 10-айда мәһсулатлирини йәршари өлчәмлиригә мас һалға кәлтүрүлгәнликини елан қилғанлиқи, пуманиң “шинҗаң билән биваситә яки васитилик сода алақимиз йоқ” дәп җакарлиғанлиқи тәкитләнгән. “муһапизәтчи “гезитиниң ейтишичә, агроизоләб тәҗрибәханисиниң тәтқиқатчиси маркус бонер ““пахта тәркибидики изотоп бармақ изи наһайити ениқ болуп, уни башқа дөләтләрдин, һәтта хитайниң башқа районлиридин кәлгән пахтидин пәрқләндүргили болиду” дегән.

Хәвәрдә ейтилишичә, “шинҗаң пахтиси” ниң излири адидас, пума, һюго бос қатарлиқ маркилиридин башқа германийәниң даңлиқ дала кийим маркиси җәк волфсикиндинму байқалған. “муһапизәтчи” гезитиниң ‍ейтишичә, улар юқириқи ширкәтләр билән алақиләшкән болуп, пума ширкити “шинҗаң пахтиси” ишлитидиғанлиқини рәт қилған. Адидас ширкити болса башқа дөләтләрниң пахтисини ишлитиватқанлиқи, пахтини башқа дөләтләрдинла мәнбә қилидиғанлиқи һәмдә тәминләш зәнҗиридики адил вә бихәтәр хизмәт шараитиға капаләтлик қилиш үчүн һәр хил тәдбирләрни қолланғанлиқини ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.