Америка һөкүмити уйғурлар дияридин чиқидиған пахта мәһсулатлирини мәни қилмақчи

Мухбиримиз әзиз
2020-09-08
Share

Уйғурлар дияридики сиясий бастуруш вә мәҗбурий әмгәккә даир көплигән дәлил-испатларниң мәлум болушиға әгишип америка һөкүмити райондин чиқидиған пахта мәһсулатлириниң америка базириға киришини мәни қилиш һәққидә қарар елишни җиддий ойлишишқа киришти.

«Ню-йорк вақти» гезитиниң 8-сентәбирдики мақалисидә көрситилишичә, трамп һөкүмити һазир уйғурлар дияридин чиқидиған пахтиға мунасивәтлик мәһсулатлариниң бир қисмини яки һәммисини мәни қилиш, шу арқилиқ хитай һөкүмитиниң уйғур вә башқа мусулманларға йүргүзүватқан зулумлирини җазалашни муһакимә қилмақтикән.

Мәзкур буйруқ чиқирилғандин кейин униң чәкләш даирисиниң қанчилик болидиғанлиқи һазирчә намәлум икән. Әмма у иҗра қилинғандин кейин америка вә явропаниң кийим-кечәк базириға зор тәсир көрситидикән. Чүнки бу базарлардики «хитайда ишләнгән» (Made in China) дегән маркидики пахта мәһсулатлириниң, шуниңдәк көп қисим дуняви даңлиқ маркиларниң мутләқ көп қисми уйғурлар дияридин чиқидиған пахта мәһсулатлирини хам әшя қилип тикилидикән.

Йеқиндин буян доналд трамп өзиниң сайлам нутуқлирида хитайға қарита техиму қаттиқ җаза тәдбирлирини елиш һәққидә сөз қиливатқан болуп, америка һөкүмитиниң хитай билән болған иқтисадий алақиси барғансери қисқармақтикән. Йәнә келип бир қисим кийим-кечәк завутлири америка һөкүмитиниң хитай мәһсулатлириға болған таможна беҗи чәклимиси түпәйлидин аллиқачан завутлирини хитайдин вийетнам, һиндонезийә, баңгладеш) бенгал(қатарлиқ җайларға йөткимәктикән.

Ройтерс агентлиқиниң 8-сентәбирдики хәвиридә ейтилишичә, нөвәттә америка һөкүмитиниң бу хил чәклимилири йәнә уйғурлар дияридин чиқидиған пәмидур мәһсулатлириниму нишан қилмақтикән. Чүнки уйғурлар дияри хитайларниң әң чоң пәмидур базилириниң бири болуп, һәр йили америкиға ғайәт зор миқдарда пәмидур қиями вә башқа мәһсулатларни експорт қилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.