Amérika hökümiti Uyghurlar diyaridin chiqidighan paxta mehsulatlirini men'i qilmaqchi

Muxbirimiz eziz
2020-09-08
Élxet
Pikir
Share
Print

Uyghurlar diyaridiki siyasiy basturush we mejburiy emgekke da'ir köpligen delil-ispatlarning melum bolushigha egiship amérika hökümiti rayondin chiqidighan paxta mehsulatlirining amérika bazirigha kirishini men'i qilish heqqide qarar élishni jiddiy oylishishqa kirishti.

"Nyu-york waqti" gézitining 8-séntebirdiki maqaliside körsitilishiche, tramp hökümiti hazir Uyghurlar diyaridin chiqidighan paxtigha munasiwetlik mehsulatlarining bir qismini yaki hemmisini men'i qilish, shu arqiliq xitay hökümitining Uyghur we bashqa musulmanlargha yürgüzüwatqan zulumlirini jazalashni muhakime qilmaqtiken.

Mezkur buyruq chiqirilghandin kéyin uning cheklesh da'irisining qanchilik bolidighanliqi hazirche namelum iken. Emma u ijra qilin'ghandin kéyin amérika we yawropaning kiyim-kéchek bazirigha zor tesir körsitidiken. Chünki bu bazarlardiki "Xitayda ishlen'gen" (Made in China) dégen markidiki paxta mehsulatlirining, shuningdek köp qisim dunyawi dangliq markilarning mutleq köp qismi Uyghurlar diyaridin chiqidighan paxta mehsulatlirini xam eshya qilip tikilidiken.

Yéqindin buyan donald tramp özining saylam nutuqlirida xitaygha qarita téximu qattiq jaza tedbirlirini élish heqqide söz qiliwatqan bolup, amérika hökümitining xitay bilen bolghan iqtisadiy alaqisi barghanséri qisqarmaqtiken. Yene kélip bir qisim kiyim-kéchek zawutliri amérika hökümitining xitay mehsulatlirigha bolghan tamozhna béji cheklimisi tüpeylidin alliqachan zawutlirini xitaydin wiyétnam, hindonéziye, banggladésh) bén'gal(qatarliq jaylargha yötkimektiken.

Roytérs agéntliqining 8-séntebirdiki xewiride éytilishiche, nöwette amérika hökümitining bu xil cheklimiliri yene Uyghurlar diyaridin chiqidighan pemidur mehsulatlirinimu nishan qilmaqtiken. Chünki Uyghurlar diyari xitaylarning eng chong pemidur bazilirining biri bolup, her yili amérikigha ghayet zor miqdarda pemidur qiyami we bashqa mehsulatlarni éksport qilidiken.

Toluq bet