Японийә кийим-кечәк ширкәтлири уйғур елидин чиқидиған пахта мәсилисидә қейин әһвалда қалған

2021-09-23
Share

Японийә вақти гезити 23-сентәбир тарқатқан бир хәвиридә, японийә кийим-кечәк ширкәтлириниң уйғур елидин чиқидиған пахта мәсилисидә қейин әһвалда қалғанлиқини билдүргән.

Хәвәрдә баян қилинишичә, уйғур елидин чиқидиған пахта илгири сүпити билән даңқ қазанған болса, у һазир уйғурларға қаритиливатқан бастурушниң вә мәҗбурий әмгәкниң символиға айлинип қалғанлиқтин кийим-кечәк ширкәтлири бу мәсилидә қейин таллашқа дуч кәлгән.

Болупму японийәниң кийим маркиси "Uniqlo" вә "Muji" вә "Mizuno" қатарлиқ маркилири буниң биваситә тәсиригә учриған.

Американиң йеңи қаидисигә асасән, импорт қилғучиларниң өзлири ишлитидиған пахтиниң уйғур елидин чиқмиғанлиқини испатлиши йетәрлик әмәс болуп, улар ишләпчиқириштин кейинки сетиш йолиниң һәр қандақ басқучидиму, уйғур елидики биңтуәнниң һечқандақ қоли йоқлуқиға капаләтлик қилиши керәккән.

Әмма японийә сода даирисиниң бир әмәлдари японийә вақти гезитигә қилған сөзидә "һазир тәминләш зәнҗирлири дуняниң һәрқайси җайлириға тарқилип кәткән бир шараитта, униң биңтуән билән һечқандақ содиси йоқлуқини мутләқ испатлаш асасән мумкин әмәс" дегән

Юқиридики ширкәтләр бир мәһәл өзлириниң мәһсулатлирида уйғур елидин чиқидиған пахта йоқлуқини илгири сүргән болсиму, бирақ кейин йәни фирансийәдики мустәқил орган 4 кийим-кечәк ширкитини әрз қилип уларни мәҗбурий әмгәккә шерик болғучилар, дәп әйиблигәндин кейин уни етирап қилишқа мәҗбур болған.

Бу ширкәтләр уйғур елиниң пахтисини ишлитишни рәт қилса хитайниң иқтисадий җазасиға учрап хитай тавар базиридин қоғлап чиқирилиштин қорқидикән, давамлиқ ишлитиверәй десә американиң сода чәклимисигә учраштин вә етибарини йоқитип қоюштин қорқидикән.

Хәвәрдә ейтилишичә, кийим-кечәк вә мунасивәтлик башқа ширкәтләр назук қарар чиқириш бесимиға дуч келиватқан болуп, уларниң сүкүт қилишни таллаш имкани йоқкән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт