Хәлқаралиқ «техиму яхши пахта һәрикити» уйғур елидики пахта мәйданлири билән алақисини үзгәнликини җакарлиди

Мухбиримиз ирадә
2020-10-22
Елхәт
Пикир
Share
Принт

Дунядики пахта тәминатиниң сиҗиллиқи вә сүпитигә капаләтлик қилиш нишани билән қурулған «техиму яхши пахта һәрикити» йәни «Better Cotton Initiative» намлиқ хәлқаралиқ орган 21-өктәбир күни хитай һөкүмитиниң уйғур елидики мәҗбурий әмгәк түзүми вә башқа инсан һәқлири мәсилиси сәвәбидин райондики пахта мәйданлири билән болған барлиқ алақисини үзгәнликини җакарлиди.

Мәзкур органниң тор бетидә берилгән баянатта мундақ дейилгән: «хитайниң шинҗаң уйғур аптоном районидики мәҗбурий әмгәк вә башқа кишилик һоқуқ дәпсәндичиликлири райондики мәшғулат муһитиниң муқимлиқиға тәсир көрсәтти. Шуңа биз бу райондики барлиқ мәйдан паалийәтлиримизни дәрһал тохтитиш қарарини чиқардуқ».

«яху хәвәрлири» ниң билдүрүшичә, бундин илгири хәлқарада мәсулиятчанлиқ билән тиҗарәт қилишни тәшәббус қилидиған «хәлқаралиқ мәсулийәт етирап қилинған мәһсулатлар» йәни «Worldwide Responsible Accredited Production» намлиқ органму еғир кишилик һоқуқ зулуми вә мәҗбурий әмгәкни нәзәрдә тутуп уйғур елидин пахта тәминләшни тохтатқаникән. юқиридики «техиму яхши һәрикити» ниң буниңға қошулуши билән мода кийим-кечәк саһәсиниң уйғур елидики пахта мәһсулатлириға тайинип ишләпчиқириш паалийәтлирини давамлаштуруши вә шундақла өз маркилириниң образини сақлап қелиши техиму қейинлишидикән.

Уйғур ели пүтүн дуняниң пахта еһтияҗиниң 20 пирсәнтини қамдайдиған болуп, кишилик һоқуқ органлири уйғур елидики биңтүвән игидарчилиқ қилидиған пахтизарлиқлар вә тоқулма ширкәтлириниң уйғурлар қул әмгәккә селинидиған әң асаслиқ саһәликини тәкитләп кәлгән. Америка һөкүмити болса уйғур елидики биңтүән вә униң пахта, пәмидур қатарлиқ мәһсулатлириға ембарго елан қилғандин кейин бу мода дуняси бара-бара тәминләш зәнҗирлирини өзгәртип, пахта мәһсулатлирини башқа дөләтләрдин импорт қилишқа йүзләнмәктә.

Чәтәлләрдики көзәткүчиләрниң қаришичә, американиң бу тәдбирлири хитай һөкүмитиниң вә һәрқандақ бир карханиниң уйғурларниң мәҗбурий әмгикидин пайда елишини тосушта үнүмлүк рол ойнимақтикән.

Пикирләр (0)
Share
Толуқ бәт