Xelq'araliq "Téximu yaxshi paxta herikiti" Uyghur élidiki paxta meydanliri bilen alaqisini üzgenlikini jakarlidi

Muxbirimiz irade
2020-10-22
Share

Dunyadiki paxta teminatining sijilliqi we süpitige kapaletlik qilish nishani bilen qurulghan "Téximu yaxshi paxta herikiti" yeni "Better Cotton Initiative" namliq xelq'araliq organ 21-öktebir küni xitay hökümitining Uyghur élidiki mejburiy emgek tüzümi we bashqa insan heqliri mesilisi sewebidin rayondiki paxta meydanliri bilen bolghan barliq alaqisini üzgenlikini jakarlidi.

Mezkur organning tor bétide bérilgen bayanatta mundaq déyilgen: "Xitayning shinjang Uyghur aptonom rayonidiki mejburiy emgek we bashqa kishilik hoquq depsendichilikliri rayondiki meshghulat muhitining muqimliqigha tesir körsetti. Shunga biz bu rayondiki barliq meydan pa'aliyetlirimizni derhal toxtitish qararini chiqarduq".

"Yaxu xewerliri" ning bildürüshiche, bundin ilgiri xelq'arada mes'uliyatchanliq bilen tijaret qilishni teshebbus qilidighan "Xelq'araliq mes'uliyet étirap qilin'ghan mehsulatlar" yeni "Worldwide Responsible Accredited Production" namliq organmu éghir kishilik hoquq zulumi we mejburiy emgekni nezerde tutup Uyghur élidin paxta teminleshni toxtatqaniken. Yuqiridiki "Téximu yaxshi herikiti" ning buninggha qoshulushi bilen moda kiyim-kéchek sahesining Uyghur élidiki paxta mehsulatlirigha tayinip ishlepchiqirish pa'aliyetlirini dawamlashturushi we shundaqla öz markilirining obrazini saqlap qélishi téximu qéyinlishidiken.

Uyghur éli pütün dunyaning paxta éhtiyajining 20 pirsentini qamdaydighan bolup, kishilik hoquq organliri Uyghur élidiki bingtüwen igidarchiliq qilidighan paxtizarliqlar we toqulma shirketlirining Uyghurlar qul emgekke sélinidighan eng asasliq sahelikini tekitlep kelgen. Amérika hökümiti bolsa Uyghur élidiki bingtüen we uning paxta, pemidur qatarliq mehsulatlirigha émbargo élan qilghandin kéyin bu moda dunyasi bara-bara teminlesh zenjirlirini özgertip, paxta mehsulatlirini bashqa döletlerdin import qilishqa yüzlenmekte.

Chet'ellerdiki közetküchilerning qarishiche, amérikaning bu tedbirliri xitay hökümitining we herqandaq bir karxanining Uyghurlarning mejburiy emgikidin payda élishini tosushta ünümlük rol oynimaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.