Уйғур елидин икки өсмүрләр путбол командиси русийәдики хәлқаралиқ мусабиқигә қатнишиду

Мухбиримиз үмидвар
2015.05.27
Share on WhatsApp
Share on WhatsApp

Русийәниң сучи шәһиридә 28-30-май күнлири өткүзүлидиған “келәчәк саңа бағлиқ” дәп нам берилгән 10-нөвәтлик пүтүн русийә өсмүрләр путбол мусабиқисиниң һәл қилғуч қисмиға уйғур елидин икки команда хитайға вакалитән қатнишиду.

Шинхуа торида ейтилишичә: 12-13 яшлиқлар вә 14-15 яшлиқлардин түзүлгән икки команда үчүн қизилсу, қәшқәр, үрүмчи, қарамай, шихәнзә вә чөчәк қатарлиқ шәһәрләрдин 16 путболчи талланған болуп, бу балилар сәпәргә атлиниш алдида үрүмчидә мәхсус паалийәт уюштурулған. Әмма, хәвәрдә мәзкур икки команда үчүн талланған балиларниң милләт тәркиби ейтилмиған болсиму, лекин сүрәтлик хәвәрдин уларниң асаслиқ қисминиң уйғур балилири икәнлики мәлум. Хитай мәтбуати бу икки командиниң сучи шәһиридә өткүзүлидиған 10-қетимлиқ хәлқаралиқ яш-өсмүрләр путбол мусабиқисигә қатнишидиғанлиқини ейтқан.

Русийәниң интерфакис агентлиқиниң хәвәр қилишичә, мәзкур мусабиқә пүтүн русийәдики дарилетам вә ятақлиқ мәктәп оқуғучилири командилириниң мусабиқиси болуп, бу мусабиқә алди билән пүтүн русийәниң 80 шәһиридә өткүзүлүп, 700 команда ичидин әң күчлүк команда таллап чиқилғандин кейин, сучи шәһиридә хәлқаралиқ характерлик һәр қилғуч мусабиқә өткүзүш қарар қилинған.

Русийәниң путбол тори “мегафон”ниң бу һәқтики хәвиридә, мәзкур һәл қилғуч хәлқаралиқ мусабиқигә қатнишидиған русийә вә башқа дөләтләрниң 24 командисиниң тизимликидин атуш шәһәрлик биринчи ятақлиқ мәктәпниң “келәчәк” дәп аталған командиси билән қарамай шәһәрлик 6-ятақлиқ мәктәпниң “келәчәк” намлиқ командиси орун алған.

Сучида башланған бу мусабиқигә қазақистан билән хитайниң тунҗи қетим қатнишиши болуп һесаблинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.