Firansiye agéntliqi xitayning "Térrorluqqa qarshi" urushining qurbanigha aylan'ghan Uyghur putbolchilar heqqide xewer tarqatti

Muxbirimiz irade
2018-09-06
Share

Firansiye agéntliqi xitaydiki herqaysi putbol komandilirida top oynaydighan, emma shi jinpingning atalmish "Térrorluqqa qarshi" urushining zerbisige uchrawatqan Uyghur putbolchilar heqqide bir mexsus xewer tarqatti.

6-Séntebir küni tarqitilghan bu heqtiki xewerde xitayning döletlik komandisigha kirish yolida ilgirilewatqan namzat mir'exmetjan muzepper tonushturulghan. Xewerde éytilishiche, xitay hökümitining bir milyondin oshuq Uyghurni "Yépiq terbiye" lagérlirigha qamighanliqi birleshken döletler teshkilati teripidin éniq tilgha élinip, xelq'ara jem'iyetning bu heqtiki endishiliri küchiyiwatqan bir mezgilde bu yil 27 yashqa kirgen Uyghur putbolchi mir'exmetjan muzepper xitay dölet komandisining térinéri, italiyelik putbol cholpini marséllo lippi teripidin komandigha chaqirtilghan. Eger u tallan'ghan teqdirde üch kündin kéyin qatar yaki behreyn bilen ötküzülidighan musabiqide xitay dölet komandisining topchisi süpitide meydan'gha chüshidiken.

Xewerde éytilishiche, qeshqerlik mir'exmetjan muzepper tyenjin "Téda" komandisining ottura meydan topchisi bolup, u mushu hepte ichide xitayning dölet téléwiziyesi CCTV ning ziyaritini qobul qilghanda marséllo lippining özini dölet komandisigha tallishini ümid qilidighanliqini, eger özige purset bérilse, nahayiti yaxshi netije yaritishqa kapaletlik qilidighanliqini éytqan.

Firansiye agéntliqining diqqitini qozghighini, xitayning CCTV qanili programma boyiche mir'exmenjanning millitini tilgha almighan, peqet mir'exmetjan özi "Téz pükmeslik shinjangliq topchilarning qénida bar" déyish arqiliq özining Uyghurluqidin pexirlinish tuyghusini ipade qilghan.

Mir'exmetjanning bu nöwet dölet komandisigha chaqirtilishi firansiye agéntliqi muxbirlirida xitay hökümitining hazirqidek bir shara'itta dunyagha "Milletler ittipaqliqi" dégenni namayan qilish yuqiridin chüshken bir siyasiy qararmu, dégen so'alni peyda qilghan. Ular buni "Bipayan sherq putbulchiliqi" tor bétining béyjingda turushluq tehriri brandon chémirstin sorighan. Brandon chémirs bundaq bir éhtimalni tamamen yoq dégili bolmisimu, emma özining lippi muzepperning qabiliyitini öz közi bilen körüshni arzu qildi dep qaraydighanliqini éytqan.

Firansiye agéntliqi yene bu yil féwralda ata-anisini yoqlap kélish üchün yurtigha qaytqanda lagérgha élip kétilgen érfanjan hézimnimu sürüshtürüp, u ilgiri top oynighan jéjyang komandisi bilen alaqileshken bolsimu bir jawab alalmighan. Uning resimimu komanda ezaliri arisidin öchürüwétilgen iken. Xewerde "Dölet re'isi shi jinping gerche xitayning putbolchiliqtiki teqdirini özgertishke tirishiwatqan bolsimu, emma Uyghur putbolchilar xitayning térrorluqqa qarshi turush herikitidin aman qalmaywatqanliqi éniq" dep yazghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet