Roytérs agéntliqi: "Uyghurlar 'orwélche qabahet' duch kelmekte!"

Muxbirimiz eziz
2018-05-15
Élxet
Pikir
Share
Print

Uyghurlar diyaridiki qattiq kontrolluq dunyadiki herqaysi axbarat wasitiliridin keng orun élip kéliwatqan bolup, 14-may küni roytérs agéntliqi bu halni "Orwélche qabahet" dep atidi.

Maqalida Uyghurlar diyaridiki herqachan kishilerni özige "Dem tartip kétidighan" nazaret méxanizmining Uyghurlargha héchqandaq aramliq imkani qaldurmighanliqi, ularning yanfonigha birer ep ornitishidin tartip chet'elge sayahetke chiqishqa intilishtek arzusigha qeder hemmila ishning ularni udul yighiwélish lagérlirigha apridighanliqi, hazirgha qeder bir milyonche Uyghurning mushundaq jaylargha qamalghanliqi heqqide xewerler otturigha chiqiwatqanliqi éytilidu.

Maqalida körsitilishiche, xitaydek nopusi dunya boyiche eng köp bolghan bir memliket shi jinping hakimiyetni qolgha alghandin kéyin dunyadiki eng zulmetlik bir makan'gha aylinip qalghan, emma pütkül xitay miqyasida Uyghurlardek éghir zulumgha uchrawatqan héchqandaq bir millet yoq iken. Yene kélip tibetlerni xelq'aradiki köpligen dangdar shexsler qollawatqan hemde ularning sergerdanliqtiki rehbiri dalay lama ulargha meniwi küch ata qiliwatqanda Uyghurlar pat-pat tashqi dunya teripidin untulghan halda öz mewjutluqi üchün tirishmaqta iken.

Maqalining axirida Uyghurlarning yardemsiz ehwali dawam qiliwerse buning aqiwiti bekmu yaman bolidighanliqi éytilip, "Bu hal mushundaq kétiwerse biz choqum bu mesilige sel qarighanliqimizgha pushayman qilimiz" déyilidu.

Melum bolushiche, in'glizche "Orwéliyan" sözi gherb dunyasida keng qollinilidighan süpet sözi bolup, jorj orwél texellusidiki en'gliyelik yazghuchi érik blayirning 1949-yili neshr qilin'ghan "1984" namliq romanida teshwiqat, nazaret, mustebitlik, hakimmutleqliq we sepsete qatarliqlar bilen liq tolghan zulmetlik jem'iyetni teswirleshte qollinilghan.

Jorj orwél texellusidiki "Orwél" dégen sözdin élin'ghan bu atalghu gherb dunyasida mustebitlik tuzum we zulumgha simwol qilin'ghan.

Toluq bet