Калифорнийә штати авам палатаси уйғур кишилик һоқуқ қарар лайиһәсини рәсмий мақуллиди

5-Айниң 20-күни, калифорнийә штати авам палатаси уйғур кишилик һоқуқ қарар лайиһәсини рәсмий мақуллиди.

Бу қарар лайиһәсини калифорнийә штатлиқ авам палата әзаси чад мәйс әпәнди тонуштурған болуп, шу күни калифорнийә штати авам палатасида 60 дин артуқ штатлиқ палата әзасиниң биләт ташлиши нәтиҗисидә рәсмий мақулланған.

Қарар лайиһәси авазға қоюлуштин аввалқи муназиридә палата әзалири уйғурларға қаритилған ирқий қирғинчилиқни тохтитишниң тәқәззаси һәққидә муһим нутуқларни сөзлиди. Мәзкур қарарниң аптори чад мәйс әпәнди уйғурлар учраватқан вәһшийликни “тарихимизға чүшкән дағ”, дәп көрсәтти. У “уйғурлар шәрқий түркистан дәп атайдиған земинда тәсәввур қилғусиз зулумлар болуватиду. . . Бу зулумни вә шундақла америкада яшаватқан уйғурларниң юртлирида лагерға қамалған, ғайиб қилинған вә алақиси үзүлгән йеқинлири сәвәбидин баштин кәчүрүватқан дәрд-әлимини көрмәскә селишқа болмайду. . .” деди.

Арқидин йәһудий авам палата вәкиллири җәс гәбриял, марк левин, әрмәни авам палата әзаси адрин назариян әпәндиләрму бир еғиздин тәсирлик нутуқ сөзләп, уйғур кишилик һоқуқ қарар лайиһәсигә болған қоллишини ипадилиди.

Адрин назариян әпәнди сөзидә “уйғурларға йүргүзүлүватқан вәһшийликләргә қарши тәдбир қоллинидиған вақит йетип кәлди. Әгәр биз бу вәһшийликниң характерини вақтида тонуп йәтмисәк, биз толиму кечикимиз, әпсуски тарихта буниң өрникини көрдуқ” деди.

Җәс гәбриял әпәндиму сөзидә б б с телевизийәсидә тарқитилған уйғур аяллири лагерларда көрүватқан инсан қелипидин чиққан муамилә һәққидики хәвәрниң өзи көргән әң қорқунчлуқ хәвәрликини әскәртип туруп: “уйғурларға йүргүзүлүватқан ирқий қирғинчилиққа қарши туруш бизниң вәзипимиз. Биз бу мәсилини давамлиқ түрдә көтүрүп чиқишимиз керәк вә бу қанун пәқәтла тунҗи қәдәм болуши керәк” дәп хитаб қилди.

Марк левин әпәнди сөзидә ирқий қирғинчилиқ билән шуғуллиниватқан хитай һакимийтииниң худди натсистларға охшаш қишлиқ олимпиккә саһибханилиқ қилмақчи болуватқанлиқини әскәртип: “һәрбир киши әмәлий һәрикәтлири билән буниңға қарши туруши керәк, тарихтики охшаш хаталиқниң садир болушиға йол қоймаслиқимиз керәк” деди.

Мәлум болушичә, мәзкур уйғур кишилик һоқуқ қарар лайиһәсниң мақуллинишида калифорнийә штатиниң һәр-қайси җайлирида яшаватқан йүздин артуқ уйғурниң өз районлириниң авам вә кеңәш палата әзалири билән йүзтуранә көрүшүп, уйғурлар учраватқан зулумларни аңлитиши, шундақла лос анжелистики дуня йәһудий көзитиш тәшкилатиниң изчил һалда уйғурлар билән һәмкарлишип һәрикәт қилиши түрткилик рол ойниғаникән.