Kaliforniye shtati awam palatasi Uyghur kishilik hoquq qarar layihesini resmiy maqullidi

Muxbirimiz irade
2021-05-21
Share

5-Ayning 20-küni, kaliforniye shtati awam palatasi Uyghur kishilik hoquq qarar layihesini resmiy maqullidi.

Bu qarar layihesini kaliforniye shtatliq awam palata ezasi chad meys ependi tonushturghan bolup, shu küni kaliforniye shtati awam palatasida 60 din artuq shtatliq palata ezasining bilet tashlishi netijiside resmiy maqullan'ghan.

Qarar layihesi awazgha qoyulushtin awwalqi munaziride palata ezaliri Uyghurlargha qaritilghan irqiy qirghinchiliqni toxtitishning teqezzasi heqqide muhim nutuqlarni sözlidi. Mezkur qararning aptori chad meys ependi Uyghurlar uchrawatqan wehshiylikni "Tariximizgha chüshken dagh", dep körsetti. U "Uyghurlar sherqiy türkistan dep ataydighan zéminda tesewwur qilghusiz zulumlar boluwatidu. . . Bu zulumni we shundaqla amérikada yashawatqan Uyghurlarning yurtlirida lagérgha qamalghan, ghayib qilin'ghan we alaqisi üzülgen yéqinliri sewebidin bashtin kechürüwatqan derd-elimini körmeske sélishqa bolmaydu. . ." dédi.

Arqidin yehudiy awam palata wekilliri jes gebriyal, mark léwin, ermeni awam palata ezasi adrin nazariyan ependilermu bir éghizdin tesirlik nutuq sözlep, Uyghur kishilik hoquq qarar layihesige bolghan qollishini ipadilidi.

Adrin nazariyan ependi sözide "Uyghurlargha yürgüzülüwatqan wehshiyliklerge qarshi tedbir qollinidighan waqit yétip keldi. Eger biz bu wehshiylikning xaraktérini waqtida tonup yetmisek, biz tolimu kéchikimiz, epsuski tarixta buning örnikini körduq" dédi.

Jes gebriyal ependimu sözide b b s téléwiziyeside tarqitilghan Uyghur ayalliri lagérlarda körüwatqan insan qélipidin chiqqan mu'amile heqqidiki xewerning özi körgen eng qorqunchluq xewerlikini eskertip turup: "Uyghurlargha yürgüzülüwatqan irqiy qirghinchiliqqa qarshi turush bizning wezipimiz. Biz bu mesilini dawamliq türde kötürüp chiqishimiz kérek we bu qanun peqetla tunji qedem bolushi kérek" dep xitab qildi.

Mark léwin ependi sözide irqiy qirghinchiliq bilen shughulliniwatqan xitay hakimiyti'ining xuddi natsistlargha oxshash qishliq olimpikke sahibxaniliq qilmaqchi boluwatqanliqini eskertip: "Herbir kishi emeliy heriketliri bilen buninggha qarshi turushi kérek, tarixtiki oxshash xataliqning sadir bolushigha yol qoymasliqimiz kérek" dédi.

Melum bolushiche, mezkur Uyghur kishilik hoquq qarar layihesning maqullinishida kaliforniye shtatining her-qaysi jaylirida yashawatqan yüzdin artuq Uyghurning öz rayonlirining awam we kéngesh palata ezaliri bilen yüzturane körüshüp, Uyghurlar uchrawatqan zulumlarni anglitishi, shundaqla los anzhélistiki dunya yehudiy közitish teshkilatining izchil halda Uyghurlar bilen hemkarliship heriket qilishi türtkilik rol oynighaniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet