Президент трамп «2020-йиллиқ уйғур кишилик һоқуқ сиясити қанун лайиһәси» ни тезрәк имзалашқа чақирилмақта

Мухбиримиз ирадә
2020-05-28
Елхәт
Пикир
Share
Принт

27-Май күни «2020-йиллиқ уйғур кишилик һоқуқ сиясити қанун лайиһәси» америка авам палатасидин 1 қарши 413 аваз билән мақуллуқтин өтүши чәтәлләрдики уйғур җамаитини қаттиқ сөйүндүрди. Бу хәвәр америкадики шундақла хәлқарадики нопузлуқ ахбаратларниңму диққитини қозғап, кәң хәвәр қилинди.

CNN Телевизийәси бу һәқтики хәвиридә америка авам палатасиниң «уйғур кишилик һоқуқ сиясити қанун лайиһәси» ни мутләқ көп аваз билән мақуллап, уни президент трампниң үстилигә қойғанлиқини алаһидә тәкитлиди.

Нөвәттә америкадики вә пүтүн дунядики уйғур җамаити һәм шундақла уйғурларниң вәзийитигә изчил диққәт қилип келиватқан барлиқ кишилик һоқуқни яқилиғучи кишиләрниң һәммиси президент трампниң уйғур кишилик һоқуқ қанунини тезрәк имзалишини тәқәззалиқ билән күтмәктә вә шу һәқтә чақириқ қилмақта.

Америка кеңәш палатаси вә авам палатаси әзалири вә шундақла америка диний әркинлик комитети қатарлиқ орунлар тивиттерда мәзкур қанун лайиһәсиниң мақулланғанлиқини тәбрикләш билән биргә әмди қанунниң дәрһал иҗра қилиниши үчүн президент трампниң қол қоюши керәкликини тәкитләшти.

Америкадики чоң иҗтимаий тәшкилатлардин болған «һәммигә адаләт» фондиниң рәиси абдул малик муҗаһид әпәндиму ақсарайға тивиттер арқилиқ чақириқ қилиш усулини қоллинип, президент трампниң «уйғур кишилик һоқуқ сиясити қанун лайиһәси» ни балдуррақ имзалашини тәләп қилди.

Америка кеңәш палатаси билән авам палатасиниң бирдәк мақуллуқидин өткән бу қанун лайиһәси ахирқи қәдәмдә президент доналд трампниң имза қоюшиға сунулиду. Америка дөләт мәҗлисиниң қанун мақуллаштики хизмәт тәртипи бойичә президент 10 күн ичидә мәзкур қанун лайиһәсигә имза қоюши керәк, шундила бу қанун лайиһәси рәсмий қанун сүпитидә күчкә игә болиду.

Пикирләр (0)
Share
Толуқ бәт