Prézidént tramp "2020-Yilliq Uyghur kishilik hoquq siyasiti qanun layihesi" ni tézrek imzalashqa chaqirilmaqta

Muxbirimiz irade
2020-05-28
Élxet
Pikir
Share
Print

27-May küni "2020-Yilliq Uyghur kishilik hoquq siyasiti qanun layihesi" amérika awam palatasidin 1 qarshi 413 awaz bilen maqulluqtin ötüshi chet'ellerdiki Uyghur jama'itini qattiq söyündürdi. Bu xewer amérikadiki shundaqla xelq'aradiki nopuzluq axbaratlarningmu diqqitini qozghap, keng xewer qilindi.

CNN Téléwiziyesi bu heqtiki xewiride amérika awam palatasining "Uyghur kishilik hoquq siyasiti qanun layihesi" ni mutleq köp awaz bilen maqullap, uni prézidént trampning üstilige qoyghanliqini alahide tekitlidi.

Nöwette amérikadiki we pütün dunyadiki Uyghur jama'iti hem shundaqla Uyghurlarning weziyitige izchil diqqet qilip kéliwatqan barliq kishilik hoquqni yaqilighuchi kishilerning hemmisi prézidént trampning Uyghur kishilik hoquq qanunini tézrek imzalishini teqezzaliq bilen kütmekte we shu heqte chaqiriq qilmaqta.

Amérika kéngesh palatasi we awam palatasi ezaliri we shundaqla amérika diniy erkinlik komitéti qatarliq orunlar tiwittérda mezkur qanun layihesining maqullan'ghanliqini tebriklesh bilen birge emdi qanunning derhal ijra qilinishi üchün prézidént trampning qol qoyushi kéreklikini tekitleshti.

Amérikadiki chong ijtima'iy teshkilatlardin bolghan "Hemmige adalet" fondining re'isi abdul malik mujahid ependimu aqsaraygha tiwittér arqiliq chaqiriq qilish usulini qollinip, prézidént trampning "Uyghur kishilik hoquq siyasiti qanun layihesi" ni baldurraq imzalashini telep qildi.

Amérika kéngesh palatasi bilen awam palatasining birdek maqulluqidin ötken bu qanun layihesi axirqi qedemde prézidént donald trampning imza qoyushigha sunulidu. Amérika dölet mejlisining qanun maqullashtiki xizmet tertipi boyiche prézidént 10 kün ichide mezkur qanun layihesige imza qoyushi kérek, shundila bu qanun layihesi resmiy qanun süpitide küchke ige bolidu.

Toluq bet