Хитай тәрәп президент трампниң «уйғур қануни» ни имзалишиға қарита америкаға тәһдит салди

Мухбиримиз әркин
2020-06-18
Елхәт
Пикир
Share
Принт

Хитай ташқи ишлар министирлиқи президент трампниң 17-июн күни «уйғур кишилик һоқуқ сиясити қануни» ға рәсмий имза қоюшиға қарши язма баянат елан қилип, америкаға тәһдит салған.

Хитай ташқи ишлар министирлиқиниң тәкитлишичә, хитай буниңға қарита «қәтий қайтурма зәрбә беридиғанлиқи вә американиң буниңдин келип чиқидиған барлиқ ақивәтләргә мәсул болидиғанлиқи» ни билдүргән. Лекин баянатта хитайниң конкрет қандақ өч алидиғанлиқи вә қандақ ақивәтләрниң келип чиқидиғанлиқи тилға елинмиған. Президент трамп 17-июн күни «уйғур кишилик һоқуқ сиясити қанун лайиһәси» гә имза қоюп, мәзкур лайиһәни рәсмий қанунға айландурған иди.

Мәзкур қанунда уйғур диярида 3 милйондәк мусулманни лагерларға қамап, уйғурларниң кишилик һоқуқини дәпсәндә қиливатқан чен чүәнго башчилиқидики хитай әмәлдарлирини җазалаш тәләп қилинған. Хитай ташқи ишлар министирлиқиниң баянатида американиң «хаталиқини дәрһал түзитиши» тәләп қилинип, бу қанунниң «шинҗаңниң кишилик һоқуқ вәзийитигә төһмәт қилғанлиқи, хитайниң шинҗаңни идарә қилиш сияситигә ғәрәзлик һуҗум қилғанлиқи» тәкитләнгән. 18-Июн күни йәнә хитайниң уйғур аптоном районлуқ хәлқ қурултийи, хитай мәмликәтлик хәлқ қурултийи, хитай мәмликәтлик сиясий мәслиһәт кеңиши қатарлиқ органлири айрим-айрим баянат елан қилип, американи әйиблигән.

Уйғур аптоном районлуқ хәлқ қурултийиниң баянатида бу қанун «шинҗаңниң террорлуққа қарши туруш, әсәбийликни түгитиш тәдбирлири вә кишилик һоқуқ вәзийитигә халиғанчә қара чаплиғанлиқ” дәп әйибләнгән. Униңда йәнә «қайта тәбийәләш» намидики лагерларниң «әсәбийликни юқтурувалған, қанунға хилап йеник қилмиш садир қилған кишиләрни қутқузувалғанлиқи» илгири сүрүлгән.

Кишилик һоқуқ тәшкилатлириниң қаришичә, уйғурларниң 2017-йилдин башлап кәң көләмдә лагерларға қамилиши «2-дуня урушидин бери бир етник милләткә қарши елип берилған әң еғир тутқун» икән.

Пикирләр (0)
Share
Толуқ бәт