Amérika hökümiti Uyghur élidiki basturushlarda qoli bolghan 4 neper xitay emeldarigha jaza élan qildi

Muxbirimiz irade
2020-07-09
Élxet
Pikir
Share
Print
Amérika tashqi ishlar ministiri mayk pompéyo ependi amérika tashqi ishlar ministirliqida ötküzülgen axbarat élan qilish yighinida söz qildi. 2020-Yili 8-iyul, washin'gton.
Amérika tashqi ishlar ministiri mayk pompéyo ependi amérika tashqi ishlar ministirliqida ötküzülgen axbarat élan qilish yighinida söz qildi. 2020-Yili 8-iyul, washin'gton.
AFP

Amérika hökümiti bügün, yeni 9-iyul küni xitay hökümitining Uyghur élide yürgüzüwatqan basturushlirida asasliq rol alghan 4 neper xitay emeldarigha jaza tedbiri élan qildi. Bu jaza tedbirliri ayrim-ayrim halda amérika tashqi ishlar ministirliqi we maliye ministirliqi teripidin élan qilindi.

Amérika tashqi ishlar ministirliqi Uyghur aptonom rayonluq partkomning sékrétari chén chüen'go, Uyghur aptonom rayonluq siyasiy-qanun komitétining sabiq sékrétari ju xeylun we Uyghur aptonom rayonluq jama'et xewpsizliki nazaritining naziri wang mingshen qatarliq 3 neper yuqiri derijilik xitay emeldarni rayondiki "Kishilik hoquqni qattiq depsende qilghuchi" dep békitken. Bu heqtiki qararda yuqiriqi üch neper xitay emeldari we ularning a'ile tawabi'atlirining amérikagha kirishining cheklen'genliki bildürülgen. Amérika tashqi ishlar ministiri mayk pompéyo bu heqtiki bayanatida yuqiriqilardin sirt yene Uyghur élidiki zulumda roli bar dep qaralghan bashqa xitay hökümet emeldarliriningmu amérikagha kirishini chekligenlikini bildürdi.

9-Iyul küni yene amérika maliye ministirliqi chén chüen'go, ju xeylun, wang mingshen we Uyghur aptonom rayonluq jama'et xewpsizliki nazaritining partkom sékrétari xo lyujün qatarliq 4 neper xitay emeldarini rayondiki "Kishilik hoquqni depsende qilishta roli bar" dep békitti. Amérika maliye ministiri sitiwin minuchin bu heqtiki bayanatida: "Amérika maliye küchidin toluq paydilinip turup, shinjang we dunyaning herqaysi jaylirida kishilik hoquqni depsende qilghuchilarni jawabkarliqqa tartishqa wede béridu," dégen.

Amérika tashqi ishlar ministiri mayk pompéyoning imzasi bilen élan qilin'ghan bu heqtiki resmiy bayanatta mundaq déyilgen: "Amérika qoshma shtatliri xitay kompartiyesining shinjangdiki Uyghur, qazaq we bashqa az sanliq milletlerge yürgüzüwatqan kishilik hoquq depsendichilikige hergiz qarap turmaydu. . . Amérika bügün shinjangdiki dehshetlik we sistémiliq depsendichiliklerge qarshi heriket qollandi. Biz xitay kompartiyesining kishilik hoquq we insanlarning erkin yashash hoquqigha qilghan ziyankeshlikliri heqqidiki endishimizge ortaqlishidighan barliq döletlerni biz bilen birlikte bu xitay hökümitining bu rezil qilmishlirini eyibleshke chaqirimiz."

Yuqiriqi bu qarar Uyghur mesilisige izchil köngül bölüp kéliwatqan we heqqaniyetni qollighuchi dunyadiki barliq kishilerni we Uyghur jama'etchilikini söyündürdi.

Toluq bet