Америка авам палатаси “уйғур мәҗбурий әмгикиниң алдини елиш қануни” ниң ахирқи лайиһәсини мақуллиди

Мухбиримиз әркин
2021-12-15
Share
Америка авам палатаси “уйғур мәҗбурий әмгикиниң алдини елиш қануни” ниң ахирқи лайиһәсини мақуллиди Америка авам палатасиниң рәиси нәнсий пелоси(Nancy Pelosi) ханим америка ташқи ишлар министирлиқида сөз қилмақта. 2021-Йили 8-декабир, вашингтон.
AP

Америка авам палатаси 14-декабир күни кәчтә биләт ташлап, бирдәк аваз билән “‍уйғур мәҗбурий әмгикиниң алдини елиш қануни” ниң ахирқи бирликкә кәлгән лайиһәсини мақуллиди. Қанун лайиһәсидә америка һөкүмити мәҗбур әмгәктә ишләпчиқиралмиғанлиқини һөкүм қилмиғучә уйғур аптоном районида ишләпчиқирилған барлиқ мәһсулатларниң америка базириға кириши чәкләнгән. Мәзкур қанунниң пәрқлиқ икки лайиһәси бу йил 7-айда кеңәш палатасида өткән һәптә авам палатасида мутләқ көп аваз билән мақулланған.

Кеңәш палатаси билән авам палатаси 14-декабир күни бу қанунниң президентниң имза қоюшиға сунулидиған ахирқи лайиһәсидә келишим һасил қилғандин кейин, бу лайиһә авам палатасида қайта авазға қоюлған. Мәлум болушичә, бу қанун лайиһәси йеқинда кеңәш палатасида авазға қоюлидикән. Әгәр у бүгүн кеңәш палатасида мақулланса президентниң имза қоюши ‍үчүн дәрһал ақсарайға йоллиниду. Қанун бойичә президент униңға 10 күн ичидә имза қоюши керәк. Мәлум болушичә, әгәр қанун лайиһәси кеңәш палатасида 3 дән 2 яки униңдин көп аваз билән мақулланса президентниң имза қоюши ‍үчүн 10 күн сақлашқиму һаҗәт қалмайдикән.

Буниң билән бу қанун лайиһәсиниң дөләт мәҗлиси байрамлиқ тәтилгә қоюп берилиштин бурун рәсмий қанунға айлинишиниң йоли ечилидикән.

Лекин “оксиюс” ториниң хәвәр қилишичә, ақсарай баянатчиси җин саки сәйшәнбә күни тунҗи қетим президент байденниң қанун лайиһәсини имзалайдиғанлиқини билдүргән. У: “биз дөләт мәҗлисиниң хитай хәлқ җумһурийитиниң шинҗаңдики кишилик һоқуқ дәпсәндичилики вә мәҗбурий әмгикигә чарә көрүш тоғрисидики қаришиға ортақлишимиз” дегән. Җин саки йәнә американиң бу мәсилидә хәлқаралиқ һәрикәт қолланғанлиқи, G7 йиғинида йетәкчилик қилғанлиқи, малийә җазаси, йәршари магнитский виза чәклимисини йолға қойғанлиқини билдүрүп, “булар бизниң бу мәсилидики вәдимизниң испати” дәп көрсәткән.

Авам палата әзаси җәймис мекговерн билән кеңәш палата әзаси марку рубио сунған бу қанун лайиһәсидә америка һөкүмити “ениқ вә қайил қиларлиқ дәлилләр” билән мәҗбурий әмгәктә ишләпчиқирилмиғанлиқини һөкүм қилмиғучә уйғур елидә ишләпчиқирилған барлиқ мәһсулатларниң америкаға кириши чәклинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт