Amérika awam palatasi “Uyghur mejburiy emgikining aldini élish qanuni” ning axirqi layihesini maqullidi

Muxbirimiz erkin
2021-12-15
Share
Amérika awam palatasi “Uyghur mejburiy emgikining aldini élish qanuni” ning axirqi layihesini maqullidi Amérika awam palatasining re'isi nensiy pélosi(Nancy Pelosi) xanim amérika tashqi ishlar ministirliqida söz qilmaqta. 2021-Yili 8-dékabir, washin'gton.
AP

Amérika awam palatasi 14-dékabir küni kechte bilet tashlap, birdek awaz bilen “‍Uyghur mejburiy emgikining aldini élish qanuni” ning axirqi birlikke kelgen layihesini maqullidi. Qanun layiheside amérika hökümiti mejbur emgekte ishlepchiqiralmighanliqini höküm qilmighuche Uyghur aptonom rayonida ishlepchiqirilghan barliq mehsulatlarning amérika bazirigha kirishi cheklen'gen. Mezkur qanunning perqliq ikki layihesi bu yil 7-ayda kéngesh palatasida ötken hepte awam palatasida mutleq köp awaz bilen maqullan'ghan.

Kéngesh palatasi bilen awam palatasi 14-dékabir küni bu qanunning prézidéntning imza qoyushigha sunulidighan axirqi layiheside kélishim hasil qilghandin kéyin, bu layihe awam palatasida qayta awazgha qoyulghan. Melum bolushiche, bu qanun layihesi yéqinda kéngesh palatasida awazgha qoyulidiken. Eger u bügün kéngesh palatasida maqullansa prézidéntning imza qoyushi ‍üchün derhal aqsaraygha yollinidu. Qanun boyiche prézidént uninggha 10 kün ichide imza qoyushi kérek. Melum bolushiche, eger qanun layihesi kéngesh palatasida 3 den 2 yaki uningdin köp awaz bilen maqullansa prézidéntning imza qoyushi ‍üchün 10 kün saqlashqimu hajet qalmaydiken.

Buning bilen bu qanun layihesining dölet mejlisi bayramliq tetilge qoyup bérilishtin burun resmiy qanun'gha aylinishining yoli échilidiken.

Lékin “Oksiyus” torining xewer qilishiche, aqsaray bayanatchisi jin saki seyshenbe küni tunji qétim prézidént baydénning qanun layihesini imzalaydighanliqini bildürgen. U: “Biz dölet mejlisining xitay xelq jumhuriyitining shinjangdiki kishilik hoquq depsendichiliki we mejburiy emgikige chare körüsh toghrisidiki qarishigha ortaqlishimiz” dégen. Jin saki yene amérikaning bu mesilide xelq'araliq heriket qollan'ghanliqi, G7 yighinida yétekchilik qilghanliqi, maliye jazasi, yershari magnitskiy wiza cheklimisini yolgha qoyghanliqini bildürüp, “Bular bizning bu mesilidiki wedimizning ispati” dep körsetken.

Awam palata ezasi jeymis mékgowérn bilen kéngesh palata ezasi marku rubi'o sun'ghan bu qanun layiheside amérika hökümiti “Éniq we qayil qilarliq deliller” bilen mejburiy emgekte ishlepchiqirilmighanliqini höküm qilmighuche Uyghur élide ishlepchiqirilghan barliq mehsulatlarning amérikagha kirishi cheklinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet