Amérika kéngesh palatasi Uyghurlar heqqidiki yene bir qanun layihesini maqullidi

Washin'gtondin muxbirimiz eziz teyyarlidi
2023.12.21

Xitay hökümitining qirghinchiliq qilmishigha qarita téximu küchlük we emeliy bolghan tedbirlerning élinishi telep qiliniwatqanda, amérika kéngesh palatasining ezaliridin gariy pétirs (Gary Peters) we sinsya lummis (Cynthia Lummis) birlikte tonushturghan “Kishilik hoquq depsendichilikige qarshi küresh qanun layihesi” 20-dékabir küni toluq awaz bilen maqullandi.

Ularning resmiy tor bétide bérilgen uchurlargha qarighanda, bu qanun layihesi nuqtiliq halda amérika soda sahesini nishan qilghan halda tüzülgen. Shundaqla amérika soda ministirliqining soda sahesidikilerge körsetmilik halda soda obyéktlirini tallap bérishide menbe bolush rolini oynaydiken. Uningda éytilishiche, amérika soda sahesi éksport qiliwatqan towarlarning bir qismi xitayning Uyghurlarni qirghin qilishigha biwasite xizmet qiliwatqan bolsa, yene bir qismi mejburiy emgek we kishilik hoquq depsendichilikige chétilidu. Bu qanun layihesi resmiy halda qanun'gha aylansa, soda sahesdikilerning xitaygha qaratqan bu xildiki éksportini qanun nuqtisidin cheklesh emelge ashidiken.

Gariy pétirs ependi bu heqte söz qilip, “Amérika kéngesh palatasining bu qanun layihesini toluq awaz bilen maqullighanliqidin bekmu pexirlendim. Bu xitay hökümitining mejburiy emgek we bashqa zulumlirigha shérik boluwatqan shirketler bilen bolidighan sodining aldini élishta bek muhim” dégen. “Uyghur kishilik hoquq qurulushi” ning diréktori ömer qanat bu qanun layihesini qizghin alqishlaydighanliqini bildürgen. U bu heqte toxtilip, “Uyghur mejburiy emgikidin menpe'et élip kéliwatqan amérika shirketlirining beziliri Uyghurlarni qirghin qiliwatqan saqchi dölitige hemdem bolup kelgen. Emdi axirlashturidighan peyt yétip keldi. Uyghurlargha qarshi zulum we jinayetlerge shérik bolushqa emdi orun yoq” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.