Amérika tashqi ishlar ministirliki Uyghur qirghinchiliqini qayta tekitlidi

Muxbirimiz eziz
2022.02.22
Share on WhatsApp
Share on WhatsApp

Amérika tashqi ishlar ministirliqi qarmiqidiki “Dunyawi jinayi ishlar edliye ishxanisi” 20-féwral küni özlirining tiwéttér bétide uchur yollap, xitay hökümitining Uyghur diyaridiki qirghinchiliq we insaniyetke qarshi jinayetlerge jawabkar ikenlikini yene bir qétim esletti. Mezkur ishxanining qirghinchiliq we insaniyetke qarshi jinayet mesililiride amérika tashqi ishlar ministiri hemde uning mu'awin ministirigha biwasite meslihet bérishtek rolidin alghanda ularning bu qétimliq bayanatini yene amérika hökümitining meydanini yene bir qétim ipadiligenlikke barawer, dep qarashqimu bolidiken.

Mezkur bayanat élan qilin'ghandin kéyin tiwéttér we bashqa ijtima'iy taratqularda köplep hembehirlendi, shundaqla her sahening qizghin alqishigha érishti. Shuning bilen birge beziler bu uchurni “Yürek” lep “Bu nahayiti yaxshi bayanat boptu. Bolsa emdi téximu köp emili we konkrét heriketler otturigha chiqsun” dédi.

Melum bolushiche, amérika hökümiti 2021-yili yanwarda dunyada tunji bolup Uyghur diyaridiki siyasiy basturushni “Irqiy qirghinchiliq” dep élan qilghandin buyan tashqi ishlar ministirliki bu heqte bayanatlar élan qilghan, shuningdek köp qétimliq muxbirlarni kütüwélish yighinliri we bashqa oxshimighan sorunlarda bu meydanini qayta-qayta ipadilep kelgen idi. Baydin hökümiti dewridimu bu mewqe dawam qilghan hemde bir qatar jaza tedbirliri ijra qilinip, Uyghur diyaridiki mejburiy emgekke chétishliq tawarlar importigha cheklime qoyulghanidi. Amérika hökümitining bu xildiki bashlamchiliq roli tüpeylidin bir qisim yawropa döletlirimu Uyghur qirghinchiliqi heqqide oxshimighan qararlarni we jaza tedbirlirini alghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.