Уйғур ирқий қирғинчилиқи мәсилисидә хитай һөкүмитини әйибләйдиған дөләтләрниң сани барғанчә көпийишкә башлиған

Мухбиримиз әзиз
2022.06.15
Share on WhatsApp
Share on WhatsApp

14-Июн күни бирләшкән дөләтләр тәшкилати (б д т) кишилик һоқуқ алий кеңишидә өткүзүлгән мәҗлистә 47 дөләт бирләшмә баянат елан қилип, хитай һөкүмитиниң уйғурларға қилған муамилисини кәскин тәнқидлигән.

Франсийә хәвәр агентлиқиниң бу һәқтики хәвиридә ейтлишичә, бу қетимлиқ бирләшмә баянатқа имза қойғанларниң бири болған голландийәниң б д т да турушлуқ баш әлчиси паул беккерс (Paul Bekkers) өзлириниң уйғурлар дуч келиватқан еғир реаллиқтин бәкму әндишә қиливатқанлиқини билдүргән. У мундақ дегән: “бир милйондин артуқ уйғурниң лагерға қамалғанлиқи һәмдә уйғурларға қарши зулумниң барғансери кеңийиватқанлиқи һәққидә һазир бәкму ишәнчлик мәлуматлар оттуриға чиқиватиду”. Исраилийәниң б д т да турушлуқ баш әлчисиму иккинчи қетим бу бирләшмә баянатқа имза қойғучилар қатаридин орун алған.

Б д т кишилик һоқуқ алий кеңиши йеқинқи мәзгилләрдә изчил уйғурлар мәсилиси түпәйлидин тәнқидкә дуч келиватқан болуп, бу хил тәнқида садалири мишел бачелетниң уйғур дияридики зияритидин кейин техиму әвҗигә чиққан. Болупму уларниң һазирғичиму уйғурлар һәққидики доклатни елан қилмай бесип қоюши һәмдә хитай һөкүмитини уйғур дияридики қирғинчилиқ мәсилисидә әйиблимәслики, дуняниң күчлүк диққитини қозғиған иди. Кишилик һоқуқни көзитиш тәшкилати хитай бөлүминиң директори софи ричардсон 14-июн күни елан қилған бу һәқтики обзор мақалисида ениқ қилип: “мишел бачелетниң ишәнчликлик дәриҗиси йеқинқи зиярәттә еғир хирисқа дуч келиватиду. Бачелет зиярәт қилған җайларда инсанийәткә қарши җинайәтләр һелиһәм давам қиливатқан әһвалда, у тездин бесип қоюлған доклатни елан қилиши лазим,” дәп көрсәтти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.