Amérikida Uyghur qizlirining hesriti teswirlen'gen roman yézildi

Muxbirimiz jüme
2013.03.02

“Kirkus kitab teqrizliri” torbétige qarighanda, amérikida xitay ölkilirige ishleshke ewetilish xewpidiki Uyghur qizlirining hesriti teswirlen'gen bir roman yézildi.

Roman'gha “Tal séwet” dep nam bérilgen bolup, bu nyu - yorkluq aptor josenna laweli xanimning tunji romani iken.

Aptor romanida, toluqsiz otturini püttürüsh aldiki Uyghur qizi méhrigülning dunyasi arqiliq, kommunist xitay hökümiti Uyghurlargha qaratqan namratlashturush siyasiti astida ingrawatqan Uyghur xelqining nöwettiki ehwali, Uyghur yashliri yoluquwatqan ishsizliq, namratliq we “Qosh til” siyasiti élip kelgen ganggirash, sherqiy türkistanchi yashlarning xitay hökümitige bolghan qarshiliq heriketliri qatarliq témilarni nahayiti epchillik bilen yorutqan.

Romaning bash qehrimani méhrigülning pul tépip öyni qamdaydighan akisi memet sherqiy türkistan musteqilliqini terghib qilghanliqi üchün xitay hökümitining yoqitish obyéktigha aylinidu, memet jéni élip teklimakan qumluqigha kirip kétidu, dadisi haraqkesh, anisi késelmen bolghachqa a'ilisining barliq yüki méhrigülning zimmisige yüklinidu.

Méhrigül oqushini dawamlashturalmay qalidu. Del shu peytte u, atalmish “Éshincha emgek küchlirini sirtlargha yötkesh” siyasitini yürgüzüsh üchün töhpe izdep yürgen yéza kadirining tizimlikige chüshüp qalidu. Yene shu mezgilde méhrigül bazarda soda qilip yürüp, bir amérikiliq xanim bilen tonushup qalidu.

Méhrigül, mektepke baralidimu? yaki xitay zawutlirigha ewetilip sersan bolushqa mejbur boldimu? u tonushup qalghan amérikiliq xanim méhrigülni qutuldurup qalalamdu?

Kitabta yuqiriqidek murekkep we keskin ziddiyetlik weqelik bayan qilin'ghan. Kitabni “Karlin” neshriyati neshr qilghan bolup, bu yil 2 - aprél amérikida neshrdin chiqidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.