Явропада тонулған уйғур рәссам мәрвайит ханимниң рәсим көргәзмиси аяғлашти

Мухбиримиз меһрибан
2015-01-29
Share

Явропада тонулған уйғур рәссам мәрвайит ханимниң бултур 30-ноябир германийәниң мюнхен шәһиридә башланған хәлқаралиқ рәсим көргәзмиси 27-январ мувәппәқийәтлик аяғлашти.

Бу қетимқи көргәзмини германийә дөләтлик психологийә академийиси уюштурған. Көргәзмигә рәссам мәрвайит ханимниң бултур түркийәниң истанбул шәһири вә германийәдә өткүзүлгән бирқанчә қетимлиқ хәлқара рәсим көргәзмисигә қатнишип мукапатқа еришкән иҗадийәтлири вә йеқинқи икки йилда сизған бир қисим йеңи иҗадийәтлиридин 70 парчидин артуқ рәсим қоюлған.

Рәссам мәрвайит ханим зияритимизни қобул қилип, көргәзминиң ғәлибилик болғанлиқидин һаяҗанланғанлиқини билдүрди. Икки айдин буян мәрвайит ханим нурғунлиған зиярәтчиләрни күтүвалған. Униң билдүрүшичә, бу көргәзмидин хәвәр тапқан мюнхен шәһәр аһалиси, германийә вә явропа дөләтлиридики уйғурлар, вә нурғунлиған рәссамлар келип зиярәт қилған.

Мәлум болушичә, мәрвайит ханимниң бу қетимқи рәсим көргәзмисигә "йипәк йолидики карван" нами қоюлған болуп, бу, мәрвайит ханимниң охшаш темидики рәсим көргәзмисиниң 3-қетимлиқи. Көргәзмигә иштирак қилған германийәдә вә явропада тонулған нурғунлиған рәссамлар мәрвайит ханимниң май бояқ рәсимлири һәққидә тохтилип, рәсимләрдә ипадиләнгән уйғур мәдәнийитигә вә рәсимләрниң бәдиий қиммитигә юқири баһа бәргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт