Yawropada tonulghan Uyghur ressam merwayit xanimning resim körgezmisi ayaghlashti

Yawropada tonulghan Uyghur ressam merwayit xanimning bultur 30-noyabir gérmaniyening myunxén shehiride bashlan'ghan xelq'araliq resim körgezmisi 27-yanwar muweppeqiyetlik ayaghlashti.

Bu qétimqi körgezmini gérmaniye döletlik psixologiye akadémiyisi uyushturghan. Körgezmige ressam merwayit xanimning bultur türkiyening istanbul shehiri we gérmaniyede ötküzülgen birqanche qétimliq xelq'ara resim körgezmisige qatniship mukapatqa érishken ijadiyetliri we yéqinqi ikki yilda sizghan bir qisim yéngi ijadiyetliridin 70 parchidin artuq resim qoyulghan.

Ressam merwayit xanim ziyaritimizni qobul qilip, körgezmining ghelibilik bolghanliqidin hayajanlan'ghanliqini bildürdi. Ikki aydin buyan merwayit xanim nurghunlighan ziyaretchilerni kütüwalghan. Uning bildürüshiche, bu körgezmidin xewer tapqan myunxén sheher ahalisi, gérmaniye we yawropa döletliridiki Uyghurlar, we nurghunlighan ressamlar kélip ziyaret qilghan.

Melum bolushiche, merwayit xanimning bu qétimqi resim körgezmisige “Yipek yolidiki karwan” nami qoyulghan bolup, bu, merwayit xanimning oxshash témidiki resim körgezmisining 3-qétimliqi. Körgezmige ishtirak qilghan gérmaniyede we yawropada tonulghan nurghunlighan ressamlar merwayit xanimning may boyaq resimliri heqqide toxtilip, resimlerde ipadilen'gen Uyghur medeniyitige we resimlerning bedi'iy qimmitige yuqiri baha bergen.