Хитай лондондики "уйғур сот коллегийәси" дә гуваһлиқ бәргүчи лагер шаһитлириға тәһдит салған

Мухбиримиз әркин
2021-09-17
Share

Хитай һөкүмити лондондики "уйғур сот коллегийәси" дә гуваһлиқ бәргүчи шаһитларға тәһдит селиш қатарлиқ һәр хил вастиларни қоллинип, мәзкур сотқа кашила қилишқа урунған.

"кода сторий" ториниң ашкарлишичә, қазақистандин әнгилийәгә берип 10-сентәбирдин 13-сентәбиргичә лондонда ‍өткүзүлгән "уйғур сот коллегийәси" ниң 2-басқучлиқ испат аңлаш йиғинида гуваһлиқ бәрмәкчи болған 3 нәпәр қазақ лагер шаһити алмута айродромида қазақистан сақчилири тәрипидин тосуп қелинған. Улар қазақистандин учалмай қирғизистан арқилиқ истанбул вә дубәй һава йоли билән лондонға учушқа мәҗбур болған.

Хәвәрдә йәнә сотта гуваһлиқ бәрмәкчи болған тәтқиқатчи вә паалийәтчиләрниңму телефон, иҗтимаий таратқу, елхәт вә башқа ‍иҗтимаий алақә вастилири арқилиқ тәһдит, қорқутуш вә паракәндичиликкә учриғанлиқи, уларниң ичидә "уйғур әдлийә архпи" ниң тәтқиқатчиси муәттәр илиқут, уйғур һәркити тәшкилатиниң тәтқиқатчиси җулийә мишап қатарлиқларниң барлиқи ейтилған. Мәлум болушичә, қазақистандин барған лагер шаһитлиридин әрбақит отарбай қазақистан дөләт хәвпсизлики хадимлириниң паракәндичиликигә учрапла қалмай, бәлки йәнә хитай даирилириниңму тәһдит селишиға учриған.

Хитай даирилири униң алтайда қелип қалған ата-аниси билән икки пәрзәнтини зиярәт қилип, уларға әгәр отарбай сотта гуваһлиқ бәрсә, уларниң яман ақивәткә қалидиғанлиқини ‍агаһландурған. Һәттә униң шаңхәйдики қиз қериндишиму телефон қилип, униңдин сотта гуваһлиқ бәрмәсликни ‍өтүнгән. Әнгилийәлик адвокат, "уйғур сот коллегйәси" ниң қанун мәслиһәтчиси һамид сабиниң ейтишичә, хитайниң бесимида икки шаһит сотта гуваһлиқ бериштин ваз кәчкән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт