Хитай ташқи ишлар министирлиқи уйғур сот коллегийәси вә гуваһчиларға һуҗум қилди

Мухбиримиз ирадә
2021-10-13
Share

Хитай һөкүмити йәнә бир қетим лондонда ечилған уйғур сот коллегийәсигә һуҗум қилған. Хитай ташқи ишлар министирлиқиниң баянатчиси җав лиҗйән 12-өктәбир күнидики ахбарат йиғинида уйғур сот коллегийәсини "ялғанчилиқ машиниси" десә, униңда гуваһлиқ бәргән гуваһчиларни "артислар" дәп һуҗум қилған. Җав лиҗийән сөзидә йәнә "бу сот коллегийәсини зораван, террорчи, бөлгүнчи тәшкилат болған дуня уйғур қурултийи пул берип ясап чиққан, хитайға қарши бир қисим күчләр қоллиған алдамчилиқ оюни" дегән.

Болупму җав лиҗйән баянатида с н н қатарлиқ даңлиқ ахбарат васитилиридә уйғур елидики лагерларда йолға қоюлуватқан инсан қелипидин чиққан түзүмләрни ашкарилап зор ғулғула қозғиған җаң фамилилик хитай сақчисиға "у өзини 2018-йили шинҗаңға бөлгүнчилик һәрикитини тәкшүрүшкә әвәтилгән сақчи дәп тонуштуруп, ялған учурларни тарқатти. У буниң бәдилигә 43 миң фондстерлиң пул алған" дәп һуҗум қилған.

Һалбуки, бу хитай сақчиси с н н теливизийәсигә қилған сөзидә өзиниң "юқири мааш вә турмуш капалити" билән һөкүмәтниң чақириқиға аваз қошуп хитай өлкисидин уйғур елигә кәлгәнликини, бирақ у йәрдә йүргүзүлүватқан уйғурларни қара-қоюқ коллектип тутқун қилиш, лагерлардики уйғурларға қаритилған системилиқ қийин-қистақ, басқунчилиқ, кәмситиш вә хорлаш қилмишлирини көргәндин кейин виҗдани чидимай, буни ашкарилаш нийитигә кәлгәнликини билдүргән. У ашкарилиған тәпсилатларму лагер шаһидлириниң баянлири билән әйнән чиққаниди.

Чәтәлләрдики уйғур көзәткүчиләрниң қаришичә, хитай һөкүмити нөвәттә уйғур сот коллегийәсидин чиқидиған нәтиҗидин вә юқиридики бу хитай сақчиси ашкарилиған тәпсилатлар қозғиған тәсирдин қаттиқ әнсиримәктикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт