Хитайниң уйғур районидики «қара күчләрни тазилаш» һәрикити униң арқисидики «һимайичилири» гә қаритилмақтикән

Мухбиримиз әркин
2019-04-19
Елхәт
Пикир
Share
Принт

cХитай даирилириниң уйғур районида қозғиған «қара күчләрни тазилаш, рәзилликни түгитиш» һәрикитиниң нишани бу хил күчләрниң арқисидики «һимайичилири» гә қаритилишқа башлиған.

«Җуңго хәвәрләр» ториниң ашкарилишичә, уйғур аптоном районлуқ интизам тәкшүрүш комитети 16‏-апрел йиғин чақирип, мәркәзләштүрүп түзәш нишанини амма арисидики «қара гуруһлар» вә «рәзил күчләр» ниң арқисидики «һимайичилири» гә қаритиш тоғрисида сәпәрвәрлик вә орунлаштуруш елип барған.

Хитай һөкүмити бу һәрикәтни 2 милйондәк уйғур, қазақ вә башқа мусулман милләтләрни йиғивелиш лагериға қамап, хәлқараниң қаттиқ тәнқидигә учраватқан бир вақитта қозғиған. Уйғур кишилик һоқуқ тәшкилатлириниң қаришичә, бу һәрикәт җинайи қилмишларға қаритилғандәк қилсиму, лекин униң асаслиқ нишани лагер сиртидики йәрлик милләтләрни «қара күчләр» гә бағлап җазалашни нишан қилған икән.

Йеқинда мәркизи интизам тәкшүрүш комитетиниң 21‏-тәптиш гурупписи уйғур райониға келип орунлашқан. Мәзкур гуруппа 9‏-апрел күни үрүмчидә сәпәрвәрлик йиғини өткүзгән иди. Шуниңдин кейин бу һәрикәт техиму әвҗ елишқа башлиған. Йеқинда алтайдики бир қазақ пуқрасиниң радийомиз хитай бөлүмигә билдүрүшичә, хитай даирилириниң «қара күчләрни тазилаш, рәзилликни түгитиш» дегини әмәлийәттә кона делоларни йеңи делодәк қайта көрүп чиқип, лагердики кишиләргә җинайәт артишниң бир баһаниси икән. У «нөвәттә бурун мәһәллидики әл-ағиниләр оттурисида һарақ ичип йүз бәргән җедәл-маҗиралар ‹қара җәмийәтниң қилмиши' дәп сүрүштүрүлмәктә» дегән.

16‏-Апрел күни өткүзүлгән уйғур аптоном районлуқ интизам тәкшүрүш комитетиниң сәпәрвәрлик йиғинида даириләр «қара күчләрни тазилаш вә рәзилликни түгитиш» һәрикитиниң һалқилиқ басқучқа киргәнлики, «қара гуруһ» лар вә «қара күч» ләрниң арқисидики «һимайичилири» гә қарши қәтий күрәш қилиш керәкликини тәкитлигән.

Пикирләр (0)
Share
Толуқ бәт