Xitayning Uyghur rayonidiki "Qara küchlerni tazilash" herikiti uning arqisidiki "Himayichiliri" ge qaritilmaqtiken

Muxbirimiz erkin
2019-04-19
Élxet
Pikir
Share
Print

cXitay da'irilirining Uyghur rayonida qozghighan "Qara küchlerni tazilash, rezillikni tügitish" herikitining nishani bu xil küchlerning arqisidiki "Himayichiliri" ge qaritilishqa bashlighan.

"Junggo xewerler" torining ashkarilishiche, Uyghur aptonom rayonluq intizam tekshürüsh komitéti 16‏-aprél yighin chaqirip, merkezleshtürüp tüzesh nishanini amma arisidiki "Qara guruhlar" we "Rezil küchler" ning arqisidiki "Himayichiliri" ge qaritish toghrisida seperwerlik we orunlashturush élip barghan.

Xitay hökümiti bu heriketni 2 milyondek Uyghur, qazaq we bashqa musulman milletlerni yighiwélish lagérigha qamap, xelq'araning qattiq tenqidige uchrawatqan bir waqitta qozghighan. Uyghur kishilik hoquq teshkilatlirining qarishiche, bu heriket jinayi qilmishlargha qaritilghandek qilsimu, lékin uning asasliq nishani lagér sirtidiki yerlik milletlerni "Qara küchler" ge baghlap jazalashni nishan qilghan iken.

Yéqinda merkizi intizam tekshürüsh komitétining 21‏-teptish guruppisi Uyghur rayonigha kélip orunlashqan. Mezkur guruppa 9‏-aprél küni ürümchide seperwerlik yighini ötküzgen idi. Shuningdin kéyin bu heriket téximu ewj élishqa bashlighan. Yéqinda altaydiki bir qazaq puqrasining radiyomiz xitay bölümige bildürüshiche, xitay da'irilirining "Qara küchlerni tazilash, rezillikni tügitish" dégini emeliyette kona délolarni yéngi délodek qayta körüp chiqip, lagérdiki kishilerge jinayet artishning bir bahanisi iken. U "Nöwette burun mehellidiki el-aghiniler otturisida haraq ichip yüz bergen jédel-majiralar 'qara jem'iyetning qilmishi' dep sürüshtürülmekte" dégen.

16‏-Aprél küni ötküzülgen Uyghur aptonom rayonluq intizam tekshürüsh komitétining seperwerlik yighinida da'iriler "Qara küchlerni tazilash we rezillikni tügitish" herikitining halqiliq basquchqa kirgenliki, "Qara guruh" lar we "Qara küch" lerning arqisidiki "Himayichiliri" ge qarshi qet'iy küresh qilish kéreklikini tekitligen.

Toluq bet