Хитай 1‏-май байримида уйғурларни тәқиб қилишни күчәйткән

Мухбиримиз әркин
2015.05.01

Хитай һөкүмити 1‏-май байрими мунасивити билән үрүмчи қатарлиқ шәһәрләрдә аманлиқ тәдбирлирини ашуруп, уйғурларни тәқиб қилишни күчәйткән.

Д у қ баянатчиси дилшат ришитниң билдүрүшичә, даириләр үрүмчи шәһиридә пойиз вогзали, айродром, қатнаш вогзали, коча аптобус бекити вә шәһәрниң кириш-чиқиш еғизлирида аманлиқ хадимлирини көпәйтип, нуқтилиқ уйғурларни тәкшүргән. Кечилик тәкшүрүш елип берип, үрүмчидики иҗарикәш уйғурларниң өйлирини ахтурған.

Дилшат ришит йәнә, үрүмчидә уйғурларниң коча аптобусиға 2 қетим тәкшүрүп чиқирилғанлиқини билдүрди. Униң көрситишичә, аманлиқ тәдбири йәнә, уйғур илиниң ғулҗа вә җәнубидики районларда охшашла күчәйтилгән. Җәнубтики йеза билән наһийә, вилайәт билән үрүмчи арилиқидики таш йолларда уйғур йолучилар тохтитип тәкшүрүлгән.

Дилшат ришит, 3 күн аввал сақчиларниң корла пойиз истансисида сомка тәкшүрүветип, бир уйғур әр-аял йолучини балиси билән қошуп тутуп кәткәнликини билдүрди. Униң көрситишичә, қәшқәргә баридиған пойизни күтүп турған бу аилилик йолучиниң тутуп кетилиш сәвәби мәлум әмәскән.

Хитай һөкүмити террорлуққа қарши аманлиқ тәдбирлирини күчәйткәнликини қәйт қилсиму, бирақ дилшат ришит, “ бу хил тәдбирләр уйғурларниң кишилик һоқуқ, ишләпчиқириш, сода вә сәпәр қилиш әркинликини боғуп, наразилиқини күчәйтиватиду” деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.