Uyghurlar: tyen'enmén aptomobil hujumigha xitay sewebchi

Muxbirimiz irade
2013.11.13


Chet'el muxbirlirining ziyaritini qobul qilghan bir qisim Uyghurlar özlirige qiliniwatqan diniy we milliy bésimni “Zorawanliqning yiltizi” dep körsetken.

Firansiye agéntliqining bayan qilishiche, 28 - öktebir tyen'enméndiki weqedin kéyin mezkur agéntliqning muxbirliri xoten'ge bérip bir qisim Uyghurlarni ziyaret qilghan. Muxbirlarning ziyaritini qobul qilghan Uyghurlar xitay hökümitining “Weqeni térrorchilar peyda qildi” dégen sözini birdek ret qilip, buninggha xitay hökümitining siyasetliri seweb boluwatqanliqini eskertken.

Ular muxbirgha xotende Uyghurlargha qaritilghan diniy we milliy bésimning qattiq küchiyip ketkenlikini, bolupmu yerlik da'irilerning Uyghur ayallirini yaghliqini éliwétishke mejburlishining xelq arisida qattiq naraziliq qozghawatqanliqini éytqan.

28-Öktebir tyen'enméndiki weqedin kéyin, xitay hökümiti weqeni “Sherqiy türkistan islam herikiti” bilen chétishliq bolghan “Térrorluq herikiti” dep atighan we bu xildiki weqelerning xitayning milliy siyasiti bilen bolghan alaqisini qet'iy ret qilghan.

Emma firansiye agéntliqining éytishiche, xotendiki Uyghurlar muxbirgha qilghan sözide xitay hökümiti Uyghurlar néme qilishidin qet'iynezer ularni “Térrorchi” dep eyibleydighanliqini bildürüp : ular héch qachan chet'elge chiqip térrorluq terbiyisi alghini yoq. Ular xotendiki hökümet emeldarliridin xapa. Bu hökümet heqiqeten nachar, shunga mushuninggha oxshash kishiler chiqip weqe tughduridu, dégen.
28-Öktebir tyen'enméndiki weqedin kéyin xitay hökümitining bayanatigha guman bilen qarighan közetküchiler xitay hökümitini Uyghurlarning derdige qulaq sélishqa chaqirdi. Ular, xitay hökümiti Uyghurlar üstidiki bésimni ayaghlashturmighan teqdirde tyen'enméndikidek weqelerning yene yüz béridighanliqini agahlandurdi.



Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.