Xitayning ikki yighinida Uyghur tébabiti boyiche dawalash, tetqiqat merkizi qurush telep qilindi

Xitay xewerliridin melum bolushiche, ötken hepte béyjingda échilghan xitayning ikki qurultiyida, yéqinqi yillardin buyan étibarsiz qéliwatqan en'eniwi Uyghur tébabitini tereqqiy qildurush, Uyghur tébabiti boyiche dawalash-tetqiqat merkezliri qurush telep qilin'ghan.

Xitayning shinjang géziti torining bu heqtiki xewiride déyilishiche, ikki yighinda wekil méng chingsey, ürümchidiki Uyghur tébabiti doxturxanisini asas qilghan halda Uyghur tébabiti boyiche dawalash tetqiqat merkizi qurush teklipini otturigha qoyghan. Méng chingsey sözide yéqinqi yillardin buyan xitayda jonggoche dawalash, mongghulche dawalash, zangzuche dawalash tetqiqat merkezliri köplep qurulup, gherbche dawalashtin perqliq bolghan en'eniwi tébabetke ehmiyet bérilgen bolsimu, emma en'eniwi Uyghur tébabitige hökümetning köngül bölüsh we meblegh ajritishi kemchil bolghanliqidin bir ewlad yash tiwiplarni terbiyilesh, Uyghur dorigerlikini tereqqiy qildurush, en'eniwi Uyghur tébabiti boyiche dawalash-tetqiqat qatarliqlarda bir izda toxtap qélish, kéngiyelmeslik, tereqqiy qilalmasliq ehwali körülgenlikini eskertken.

Matériyal we inkaslarda, uzun yilliq tereqqiyat tarixigha ige Uyghur milliy tébabiti 80-yillarda tére késel, ashqazan-üchey késelliri qatarliq ichki késelliklerni dawalashtiki netijiliri bilen xitay, ottura asiya, gherbiy jenubi asiya döletliride tonulup sherep qazan'ghan bolsimu, emma 2000-yillardin kéyin xitay hökümet da'irilirining siyaset jehette Uyghur tiwiplirigha xitay tili ötkili namidiki émtihanlarni zorlap téngishi qatarliq tosalghularni qurup, ularning doxturluq kinishkisi élishini hemde Uyghurche shexsi doxturxanilarning tijaret kinishkisi béjirishini tesleshtürüshi shundaqla iqtisadiy jehette Uyghur tébabiti tetqiqatida we yéngi bir ewlad Uyghur tiwiplirini terbiyileshte meblegh kemchil bolghanliqi üchün Uyghur milliy tébabiti boyiche dawalashta zor chékinish otturigha chiqqan idi.