Xitay hökümiti Uyghur rayoni bilen tibetni tutashturidighan tömür yol yasimaqchi bolghan

Washin'gtondin muxbirimiz jewlan teyyarlidi
2024.06.03

Xitay hökümiti xitayning her qaysi jaylirini “Qatnash tori bilen qaplash”, bolupmu Uyghur rayoni bilen tibettek istratégiyelik muhim jaylarning “Xewpsizlikini qoghdash” we u rayonlarni kontrol qilishni kücheytish üchün Uyghur rayonidin tibetke baridighan qatnash yolini rawanlashturush qurulushini bashlimaqchi bolghan.

“Jenubiy xitay etigenliki pochtisi” gézitining 3-iyun bergen xewirige qarighanda, xitay tömür yol idarisi gherbiy rayondiki nurghun jaylarning téxi échilmighanliqini, Uyghur rayoni bilen tibetke kirip-chiqidighan asasliq we istratégiyelik yollarning téxi yasalmighanliqini bildürgen hemde “Gherbiy rayonning tömür yol toridiki boshluqni toldurup, mezkur rayonlar bilen ichkiri xitay otturisidiki köp liniyelik qatnash yolini rawanlashturushning muhimliqi” ni tekitligen.

Xewerde éytilishiche, xitay hökümiti nöwette Uyghur rayoni bilen tibetning tömür yol baghlinishini kücheytishni pilanlawatqan bolup, uning buningdiki asasliq gherizi mal teminlesh zenjiri bilen énérgiye xewpsizlikini kapaletke ige qilish iken. Chünki Uyghur rayoni xitayning yawropa bazirigha mal chiqiridighan muhim derwazisi bolsa, tibet we chingxey égizliki xitayning gherbiy rayon dölet mudapi'esi üchün muhim rayon hésablinidiken.

Xewerde mundaq déyilgen: “Xitay hökümiti ötken on yilda bu ikki rayonning xewpsizliki we jem'iyet tertipini qoghdashqa küchep keldi. Emdilikte bolsa, bu rayonlarni qatnash tori bilen qaplap, yoluchi toshush, yük toshush, bu rayonlardiki mallarni xitayning ichkiri ölkilirige toshush, rayonlar ara qoshulushni yenimu kücheytishning aldinqi shertini hazirlash zörür boldi”.

Melum bolghinidek, ötken 10 yilda tibette yuqiri bésimliq siyaset yürgüzüp, arqidin Uyghur rayonida irqiy qirghinchiliq élip barghan xitay hökümiti bu rayonlarni tinchitqanliqini, “Muqimsizliq amillirini yoq qilghanliqini” dawrang qilghandin kéyin, emdilikte qatnash yolini tereqqiy qildurup, bu rayondiki mehsulatlarni xitaygha toshush, xitaydin bolsa ahale köchürüsh arqiliq rayonlar ara qoshulushni ilgiri sürmekchi bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.