Amérika kishilik hoquq orgini junggoning Uyghur we tibetlerni yötkesh siyasitini tenqid qildi
2015.11.05
Amérika kishilik hoquq teshkilati- erkinlik sariyining prézidénti mark logan amérika dölet mejliside guwahliq bérip, xitay yolgha qoyghan bezi mejburiy tedbir adem bidikchilikining küchiyip kétishige türtke boluwatqanliqini ilgiri sürdi.
Mark logan bu sözlerni amérika awam palatasining kishilik hoquq shöbe komitéti charshenbe küni chaqirghan guwahliq yighinida qilghan. Guwahliq yighini amérika dölet ishlar ministirliqining 2015 -yilliq xelq'ara adem bidikchilik mesilisige da'ir yilliq doklati munasiwiti bilen chaqirilghan idi.
Mark logan, xitay pilanliq tughut siyasitining tesiri ayal yétishmeslik mesilisini peyda qilghanliqi, shinjang we tibettiki asasliq étnik we diniy toplarni meqsetlik halda ularning ziyinigha yötkeshke urunush qatarliq amillar xitayda adem bidikchilikining küchiyip kétishini keltürüp chiqarghanliqini tekitligen.
Xitay hökümiti Uyghur yéza emgek küchlirini ichkiri ölkilerge yötkep, ishqa orunlashturushni yolgha qoyghan'gha xéli yil boldi. Da'irilerning qeyt qilishiche, bu Uyghur yéziliridiki namratliq mesilisini hel qilish charisining bir qismiken.
Biraq bu chare, Uyghur pa'aliyetchilirining tenqidige uchrighan. Ular Uyghur yéza emgek küchlirining héchqandaq ijtima'iy sughurta kapaliti yoqluqini, bu chare adem bidikchilirining ishigha yaraydighanliqini agahlandurup kelgen.
Mark logan guwahliq yighinida yene, xitayning b d t ning adem bidikchilirige qarshi alaqidar ehdinamilirini toluq ijra qilmaywatqanliqini ilgiri sürgen. Charshenbe künki yighinda yene, amérika dölet ministirliqining adem bidikchilikige qarshi turush ishlirigha mes'ul emeldarlar guwahliq bergen.