Shinjang uniwérsitétining mektep belgisidin Uyghurche xet chiqiriwétilgen

Tashpolat téyip, arslan abdulla, abdukérim raxman, rahile dawut qatarliq az dégende 60 nechche neper mudir, proféssor we ilmiy xadimliri lagérgha tutup kétilgen shinjang uniwérsitétining mektep belgisidiki “Shinjang uniwérsitéti” dégen Uyghurche xet yéqinda chiqiriwétilgen.

Az kem yüz yilliq tarixqa ige, Uyghur aptonom rayonidiki eng aliy bilim yurti bolghan we Uyghur pen-medeniyitining böshüki hésablinidighan bu uniwérsitétning nöwettiki mektep belgiside peqet xitayche bilen in'glizche “Shinjang uniwérsitéti” dégen xetler qaldurulghan. Xitay da'iriliri ilgiri “Qosh tilliq ma'arip” nami astida bu uniwérsitétning Uyghur tilidiki oqutush ishlirigha xatime bergen idi.

Ikki yildin buyan dawam qiliwatqan “Ikki yüzlimichilikke qarshi heriket” dolqunida mektepning Uyghur rehberliri bilen we dangliq oqutquchiliri tutqun qilghandin bashqa yene “Mesile bar oqush matériyalliri” dégen nam astida Uyghur tilidiki zor bir türküm oqutush matériyallirining yoq qilin'ghanliqi melum bolghan idi.

Ilgiri radiyomizgha kelgen inkaslarda bezi jaylarda méhrapning shekli chiqqan öy-imaretlerning chéqiliwatqan yaki rémont qiliniwatqanliqi pash qilin'ghan idi. Radiyomizning éniqlashliri dawamida ürümchidiki milliy tüste sélin'ghan “Miraj” réstoranining sahiplirining tutqun qilin'ghanliqi we binadiki diniy we milliy simwollarning sökiwétilgenliki delillen'gen idi. Közetküchiler xitay da'irilirining Uyghur rayonida medeniyet qirghinchiliqi élip bérishta qedimini téximu chong we téz bésiwatqanliqini ilgiri sürmekte.