Uyghur rayonining tokini ichkirige yötkeydighan dunyadiki eng chong transformator qurulushi pütken

Muxbirimiz erkin
2018-04-16
Élxet
Pikir
Share
Print

Uyghur rayonining éléktr tokini xitayning ichkiri ölkilirige yötkeydighan dunyadiki eng chong yuqiri bésimliq éléktr transiformator qurulushi 15‏-aprél resmiy pütken.

Uzunluqi 3 ming 300 kilométirliq bu éléktr liniyesi Uyghur élining kömüri arqiliq éléktr toki ishlepchiqirip, xitayning ichkiri ölkilirini pakiz énérgiye bilen teminlesh pilanining gholluq qurulushidur.

Xitay hökümiti bu qurulush türini 2009‏-yili "5‏-Iyul weqesi" din kéyin otturigha qoyghan. Xitay hökümiti shu weqedin kéyin Uyghur rayonigha meblegh sélishni tézlitip, mezkur rayon bilen xitayning ichkiri ölkilirini öz'ara baghlaydighan bezi gholluq ul esliheler qurulushlirini bashlighan.

Uyghur rayonida kömür éléktr istansilirini qurup, kömürni jayida serp qilish, uning tokini ichkiri ölkilerge yötkep, ularni pakiz énérgiye teminlesh mana shu qurulush türlirining biri idi. Lékin bu qurulush Uyghur pa'aliyetchilirining naraziliqigha uchrighan.

Ular bu qurulushning xitay ölkilirini pakiz énérgiye bilen teminlep, ularning muhitini yaxshilisimu, biraq bu Uyghur rayonning muhitini weyran qiliwétidighanliqi, rayonning yéza igiliki, kishilerning salametlikige buzghunchiliq qilidighanliqini agahlandurup kelgen idi.

Xitay axbarat wasitilirining xewiride bayan qilinishiche, mezkur éléktr liniyesi Uyghur rayonining sanji oblastidin bashlinip, xitayning enxuy ölkisidiki guchüen bazirida toxtaydiken.

Bu jeryanda 6 ölkini késip ötidiken. Xewerde, uning dunyadiki tok bésimi, transformatorining sighimchanliqi, éléktr liniyesining uzunluqi we téxnika jehetlerde dunyadiki eng chong éléktr qurulushi ikenlikini bildürülgen. Xewerde qeyt qilinishiche, uning transformatorining tok sighimchanliqi 12 milyon kilowat iken.

Toluq bet