Уйғур дияри хитайниң әң чоң тоқумичилиқ вә кийим-кечәк санаәт базисиға айландурулмақчи

Хитайниң шинхуа агентлиқиниң хәвәр қилишичә, йеқинда уйғур аптоном районлуқ һөкүмәт завут иҗарисини кәчүрүм қилиш, төвән өсүмлүк қәрз бериш қатарлиқ шәкилләр арқилиқ хитай өлкилиридики кийим-кечәк завутлирини қәшқәр, ақсу, хотән қатарлиқ җайларда йеңидин завут ечишқа риғбәтләндүридикән.

Хәвәрдә ейтилишичә, уйғур аптоном районлуқ парткомниң муавин секретари ляң юң бу қетимқи тоқумичилиқ вә кийим-кечәк базиси қурулушиға лазимлиқ тәхминән 50 милярд сом хираҗәтниң пат йеқинда һәл қилинидиғанлиқини ейтқан. Буниң билән бу базида яритилған хизмәт орни 110 миңға йәткүзүлидикән.

“хитай тори” ниң русчә хәвиригә асасланғанда уйғурлар диярини тоқумичилиқ вә кийим-кечәк базисиға айландурушниң асаслиқ мәқсити уйғурлар райониға қошна болған оттура асия вә русийә базириниң тоқумичилиқ вә кийим-кечәк еһтияҗини қандуруш икән.

Хәвәрдә ейтилишичә, русийәниң һазирқи тоқумичилиқ вә кийим-кечәк санаити дөләт ичи еһтияҗиниң 20 пирсәнтинила тәмин етәләйдиған болуп, қалғини асасән хитай билән болидиған импорт содиси арқилиқ тәминлинидикән. Бундақ зор еһтияҗ үчүн мал баһаси әрзан болған уйғурлар районида тоқумичилиқ вә кийим-кечәк базиси бәрпа қилиш русийәниң импорт содиси үчүн зор әһмийәткә игә икән.

Алақидар учурларға қариғанда, уйғурлар дияридин чиқидиған пахта пүткүл хитай пахта мәһсулатиниң 60 пирсәнтини тәшкил қилиду.

Әмма көзәткүчиләр, мәзкур завутларда йеңидин яритилған хизмәт пурсәтлириниң уйғурларниму мәнпәәтләндүридиғанлиқиға гуман билән қаримақта.