Чен чүәнго уйғур елиниң тор вә учур бихәтәрликини сақлаш үчүн "сәккиз нуқтиға капаләтлик қилиш" ни тәләп қилған

Өз мухбиримиз қутлан
2016-11-28
Share

Мәлум болушичә, "тор вә учур бихәтәрликигә капаләтлик қилиш вә бу саһәдики хизмәтләрни башқурушни күчәйтиш" бәлгилимиси даириләрниң нөвәттә уйғур аптоном районида тәкитләватқан әң һалқилиқ башқуруш чарилириниң бири икән.

Тәңритағ ториниң бу һәқтики хәвиригә қариғанда, уйғур аптоном районлуқ парткомниң секритари чен чүәнго 27-ноябир күни тор вә учур бихәтәрликини сақлаш үчүн мунасивәтлик органлардин "сәккиз нуқтиға капаләтлик қилиш" ни тәләп қилған.

У, "тор бихәтәрликини қоғдап, учурлаштуруш хизмитини күчәйтиш партийә вә дөләтниң истратегийәлик омумий вәзийитигә шундақла дөләт бихәтәрлики билән идеологийә бихәтәрликигә мунасивәтлик муһим мәсилә" дәп көрсәткән.

Хәвәрдә көрситилишичә, чен чүәнго тор вә учур бихәтәрликини башқуруш орунлиридин тәләп қилған "сәккиз нуқтилиқ капаләт" ниң биринчиси  - "компартийәгә болған мутләқ садиқлиқ" икән.

Ундин башқа у йәнә, тор бихәтәрликини башқуруш орунлиридин "сиясий йөнилишкә капаләтлик қилиш, базини мустәһкәм сақлашқа капаләтлик қилиш" ни тәләп қилған.

Игилинишичә, бу йил киргәндин буян даириләр уйғур елида интернет вә аммивий тор бәтлиригә болған контроллуқни мислисиз дәриҗидә күчәйткән болуп, бирқанчилиған уйғур тор язғучилири билән тор бәт башқурғучилириниң тутқун қилинғанлиқи мәлум.

Көзәткүчиләр, әгәрдә хитай йәр шари бойичә интернетқа әң күчлүк чәклимә қойидиған дөләтләрниң бири дейилсә, у чағда уйғур ели билән тибәт шәк-шүбһисизки, хитайдики интернет қамали әң күчлүк районлар һесаблиниду, дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт