Uyghur aptonom rayonluq siyasiy kéngeshning Uyghur we tunggan hey'etliri jazalan'ghan

Uyghur aptonom rayonluq siyasiy meslihet kéngishi 7-may küni qarar maqullap, mezkur kéngeshning bir Uyghur hey'iti bilen bir tunggan hey'itining wekillik salahiyitini élip tashlighan.

Hey'etlerning biri “Milliy öchmenlikke qutratquluq qilish”, “Milliy kemsitish jinayiti” bilen, yene biri “Para élish jinayiti” bilen eyiblen'gen. Lékin qararda, ularning konkrét qandaq “Milliy kemsitish jinayiti” sadir qilghanliqi, “Milliy öchmenlikke” konkrét qandaq qutratquluq qilghanliqi we para alghanliqigha tepsiliy chüshenche bérilmigen.

“Shinjang géziti” ning xewer qilishiche, bu qarar Uyghur aptonom rayonluq 12-nöwetlik siyasiy meslihet kéngishining 7-may küni ötküzülgen 11-qétimliq yighinida maqullan'ghan. Qararda, ürümchi sheherlik yéza-bazar layihilesh bashqurush idarisining sabiq mu'awin bashliqi nurmemet abduraxmanning para élish jinayiti, korla shehiri chawyang ahaliler rayonidiki ““Inaqliq meschiti” ning sabiq yardemchi imami ma yöchünning “Milliy öchmenlikke qutratquluq qilish”, “Milliy kemsitish jinayiti” sadir qilghanliqi seweblik ularning wekillik salahiyiti bikar qilin'ghanliqi tekitlen'gen.

Qararda tekitlinishiche, bu qétim wekillik salahiyiti bikar qilin'ghanlarning ichide bir xitaymu bar iken. Qararda, Uyghur aptonom rayonluq teptish mehkimisining sabiq mu'awin bash teptishi li yüsünning “Xizmette qanun'gha éghir xilapliq qilghanliqi” seweblik da'imiy hey'etlik salahiyiti bikar qilin'ghanliqi bildürülgen.

Chet'eldiki Uyghur közetküchilerning qarishiche, bu qarar xitay da'irilirining 2017-yili bashlan'ghan yerlik milletlerni rayonning siyasiy hakimiyet organliridin keng kölemlik tazilap chiqirish herikitining qismi iken.