Хитайниң 2017-йили үрүмчи 5-түрмидә 1500 уйғурни бирақла сотланғанлиқи илгири сүрүлди

Мухбиримиз әркин
2020-04-13
Елхәт
Пикир
Share
Принт

Хитай һөкүмитиниң 2017-йили 6-айда уйғур дияриниң бир кәнтидики барлиқ уйғурларни тутқун қилип, бу кәнтниң әркәклирини үрүмчи 5-түрмидә бирақ сотлиғанлиқи илгири сүрүлди.

Бу хәвәрни «маяк» намлиқ бир тор агентлиқи 13-апрел твиттерда елан қилған. Хәвәрдә бу учурни өз вақтида уйғур райониға «ярдәм» гә барған бир хитай кадириниң «маяк» агентлиқиға ашкарилиғанлиқи тәкитләнгән.

Бу хитай кадириниң илгири сүрүшичә, 2017-йили 6-айниң 17-күни әтигән таң сәһәрдә толуқ қоралланған хитай сақчилири уйғур дияриниң бир кәнтидин тутуп келингән 1500 нәпәр уйғур мәһбусни үрүмчи 5-түрмигә елип кәлгән.

Бу хитай кадири тутқунларниң 25 аптобусқа бесип елип келингәнлики, уларни 5-түрмидә 150 нәпәр қораллиқ алаһидә сақчи, 200 нәпәр сақчи хадими, түрмидики 300 нәпәр җинайәтчи күтүвалғанлиқини билдүргән. Лекин бу хитай кадири тутқунларниң қайси кәнтлик икәнликини тилға алмиған. У хитай азадлиқ армийәсиниң 2000 нәпәр әскириниң бу кәнттики пүтүн аһалини тутқун қилип, әркәклириниң 5-түрмигә елип келингәнлики, башқа аилә әзалириниң мәктәпләргә қамилип, вақитлиқ тәкшүрүшкә елинғанлиқини илгири сүргән.

Униң тәкитлишичә, тутқунда қечишқа урунған 5 нәпәр кәнт пуқраси өлтүрүлгән шундақла бәзи тутқунлар 28 саәт давамлашқан сәпәрдә өлгән. У тутқунларниң 30 пирсәнтиниң 60 яштин юқири икәнлики, уларниң 5 йилдин 10 йилғичә кесилгәнлики, 10 йилдин артуқ кесилгәнләрниң башқа җайға елип кетилгәнлики, уларниң адвокат тәклип қилиши яки әрз қилишиға йол қоюлмиғанлиқини билдүргән.

Көзәткүчиләрниң илгири сүрүшичә, бу учур уйғур районида шу мәзгилләрдики чоң тутқунда йүз бәргән һадисиләргә мас келидикән.

Пикирләр (0)
Share
Толуқ бәт