Уйғур районидики түрмиләрдиму мәһбусларға хитай тили өгиниш мәҗбурийити барлиқи мәлум болмақта

Мухбиримиз ирадә
2019-05-28
Елхәт
Пикир
Share
Принт

«Җуңго хәвәрләр тори» ниң 28-май күнидики хәвиридә шихуға қарашлиқ 11-түрмә районидики ваң вей исимлик түрмә сақчисиниң хизмәтлири тәшвиқ қилинған бир парчә хәвәр елан қилинған. Хәвәрдә, ваң вей исимлик бу сақчи хизмәткә қатнашқандин буян өзиниң көп хил иқтидарини җари қилдурғанлиқи, мәсилән түрмигә йеңи кәлгәндә бир еғизму дөләт тили сөзлийәлмәйдиған бир мәһбусниң ваң вейниң зерикмәй чүшәндүрүши нәтиҗисидә дөләт тили йәни хитайчини наһайити раван сөзләйдиған вә һәтта қәдимий шеирларниму ядлиялайдиған болуп кәткәнлики баян қилинған.

Хитай һөкүмити уйғур елидә йолға қойған аталмиш «қайта тәрбийә лагерлири» дин қутулуп чиққан лагер шаһитлири өзлириниң лагерда хитайчә өгинишкә вә ши җинпиңниң нутуқлирини ядлашқа мәҗбурланғанлиқини билдүргән иди.

Хәвәрдә ваң вейниң түрмидикиләргә мәхсус хитай тили шеирлири, хитайчә хәтләр вә башқиларни системилиқ өгәткәнлики илгири сүрүлгән.

Чәтәлләрдики көзәткүчиләрниң қаришичә, шихудики түрмигә аит хәвәрдин түрмиләрдики уйғур мәһбусларниң һазир хитайчә өгинишкә мәҗбурлиниватқанлиқини ениқ көрүвелишқа болидикән.

Бундин башқа йәнә хәвәрдә, чәтәлләрдики уйғурларниң күчлүк наразилиқини қозғаватқан йәни әрлири лагерға соланған өйләргә «қошмақ туғқан» кадир сүпитидә орунлаштурулуватқан хитай кадирлар мәсилисигә аит мәзмунларму орун алған. Хәвәрдә «ваң вей шихуниң иттипақ йолида олтурушлуқ гүли һәдини давамлиқ йоқлап туриду. Гүли һәдә өйидә пәқәт бир кичик қизи билән яшайду, парчә-пурат ишларни қилип җан бақиду. Ваң вей вә униң сәпдашлири қәрәлсиз һалда келип, уни соға-саламлар билән йоқлап туриду» дейилгән.

Пикирләр (0)
Share
Толуқ бәт