Уйғур кишилик һоқуқ қурулуши: «муһәммәд салиһ һаҗимниң тутқун қилинғанлиқидин әндишә қилмақтимиз»

Мухбиримиз шөһрәт һошур
2018-01-24
Елхәт
Пикир
Share
Принт

Вашингтондики «уйғур кишилик һоқуқ қурулуши» бүгүн баянат елан қилип, йеқиндин буян иҗтимаий таратқуларда тарқалған мәшһур диний алим муһәммәд салиһ һаҗимниң тутқун қилинғанлиқи һәққидики хәвәрләрдин әндишә қиливатқанлиқини билдүрди. Баянатта хитай һөкүмитини муһәммәд салиһ һаҗим вә униң биваситә уруқ-туғқанлириниң әһвали һәққидә мәлумат беришкә дәвәт қилған шундақла хәлқара органларни муһәммәд салиһ һаҗимниң саламәтлик әһвалини сүрүштә қилишқа чақириқ қилған.

Баянатта муһәммәд салиһ һаҗимниң «қуран кәрим» ни һазирқи заман уйғур тилиға тәрҗимә қилған, уйғурлар арисида юқири абруйға игә мөһтәрәм диний зат икәнлики, униң бу йил 82 яшқа киргәнлики әскәртилгән.

Фәйсбок қатарлиқ иҗтимаий таратқуларда муһәммәд салиһ һаҗимниң бундин 40 күнчә илгири қизи нәзирә муһәммәд салиһ вә күйоғли, атақлиқ шаир адилҗан туняз билән бирликтә тутуп кетилгәнлики хәвәр қилинған иди.

«Уйғур кишилик һоқуқ қурулуши» ниң башлиқи өмәр қанат әпәнди мәзкур баянат һәққидә радийомизға қилған сөзидә, хәвәр гәрчә рәсмий дәлилләнмигән болсиму, әмма өз саһәлиридә көзгә көрүнгән вә мәлум тәсиргә игә бир аилидики үч кишиниң бирақла тутқун қилинғанлиқи һәққидики бу хәвәрниң уйғур җәмийитидә күчлүк әндишә пәйда қилғанлиқи, униң үстигә уйғур районида нөвәттә мәвҗут болуп туруватқан «тәрбийәләш мәркизи» намидики җаза лагерлириниң мәзкур әндишини техиму күчәйткәнликини баян қилди.

Пикирләр (0)
Share
Толуқ бәт