Әл җәзирә: «коммунистик садақәт уйғурларни хитайниң тутқун қилишидин сақлап қалалмиди»

Мухбиримиз әркин
2019-10-30
Елхәт
Пикир
Share
Принт

Қатарниң «әл җәзирә» телевизийә қанили йеқинда уйғурла һәққидә хәвәр берип, коммунистик садақәт хитайниң уйғурларни тутқун қилишидин сақлап қалалмиғанлиқини билдүргән.

Хәвәрдә, турпан шәһәрлик маарип идарисиниң муавин секретари әнвәр ниязниң тәқдири алаһидә тонуштурулуп, һаятиниң 30 нәччә йилида компартийәгә ишлигән әнвәр ниязниң 2018‏-йили 4‏-айда тутқун қилинип, лагерға елип кетилгәнлики, униң аилисигә һечқандақ чүшәнчә берилмигәнлики, һалбуки у, бу райондики кәң көләмлик тутқунда қолға елинған йүз миңлиған уйғурниң бири икәнлики тәкитләнгән.

Хәвәрдә, йәрлик коммунист «сәрхили» болуштәк бу салаһийәт уларни қоғдап қалалмиғанлиқи, башқа уйғур сәрхиллириниңму әнвәр ниязға охшаш тәқдиргә дуч кәлгәнлики илгири сүрүлгән. Хәвәрдә баян қилинишичә, нөвәттә тутқунларниң чәтәлдики уруқ-туғқанлири хәлқара җамаәтни хитайға бесим ишлитип, өзлириниң уруқ-туғқанлирини қоюп бериш тоғрисида техиму қаттиқ бесим ишлитинишкә чақирмақта икән.

Хәвәрдә, әнвәр ниязниң белгийәдики оғли әзһәр әнвәрниң дадиси тутқун қилинғандин кейин башқа уруқ-туғқанлириниң бихәтәрликидин әнсирәп бир мәзгилдә сүкүт қилған болсиму, лекин ахирида униң бу сүкүтни бузғанлиқи, униң иҗтимаий таратқуларда хитайниң «шинҗаң вәзийити һәққидики чүшәндүрүши» гә җәң елан қилғанлиқи, һалбуки йеқинда униң дадисиниң қоюп берилгәнлики һәққидә учур алғанлиқи билдүрүлгән.

Әзһәр әнвәр «әл-җәзирә» ниң мухбириға өзиниң дадиси билән көрүшкәнликини билдүрүп, «дадам яман әмәстәк туриду. Әмма тутқун қилинған вақиттикидин 10 йил қерип кәткәндәк көрүниду» дегән. Нөвәттә, чәтәл таратқулирида муһаҗирәттики уйғурларниң аилә әзалирини тутқун қилип, лагерларға қамиғанлиқи яки қамаққа һөкүм қилғанлиқиға даир бу хил хәвәрләр давамлиқ елан қилинмақта. Канада ахбарат ширкити CBC радийоси өткән һәптә канаданиң ванкавур шәһиридә турушлуқ уйғур қизи дилнур қурбанни зиярәт қилип, униң иниси вә дадисиниң тутқун қилинғанлиқи һәққидә хәвәр бәргән. Дилнур қурбанниң билдүрүшичә, униң дадиси қоюп берилгән болсиму, лекин униң инисиниң 2017‏-йили 10‏-айда тутқун қилинғандин бери һазирға қәдәр һечқандақ из-дерики йоқ икән.

Пикирләр (0)
Share
Толуқ бәт