Uyghur élida yanfon we kompyutérlarni tizimlitip sétish belgilimisi élan qilindi

Xitayning hökümet xewer menbeliridin ashkarilinishiche, Uyghur éli da'iriliri 2015-yildin bashlap, yanfon we kompyutérlarni kimlik boyiche tizimlitip, sétish-sétiwélish tüzümi yolgha qoyulidighanliqini jakarlighan. Da'iriler yene we bu belgilimini tüzüshtiki meqsiti ziyanliq uchurlarni tarqitishning aldini élish ikenlikini bildürgen.

Shinjang xewer torining 29-yanwardiki xewiride déyilishiche, yéqinda élan qilin'ghan “Uyghur aptonom rayonluq yanfon we munasiwetlik éléktron mehsulatliri bazirini nazaret qilip bashqurush nizamnamisi”de,yanfon we bashqa munasiwetlik éléktronluq mehsulatliri sodisi bilen shughullan'ghuchilar we nimkesh yanfon,kompyutér sétiwalghuchilarni tizimgha élish belgilen'gen. Xewerde belgilimining asasliqi yanfon qatarliq éléktronluq mehsulatlar sodisi bilen shughullan'ghuchilargha qaritilghanliqi ilgiri sürüldi. Belgilimide, nimkesh yanfon sétiwalghuchilarningmu tizimgha élinidighanliqi, ilgiri yanfon kartisi sétiwalghanlarning nizamnamidiki belgilimilerge asasen békitilgen nuqtilargha bérip tizimgha aldurushi telep qilin'ghan.

Xewerde yene, mezkur nizamnamini Uyghur aptonom rayonluq soda-sana'etni memuriy bashqurush idarisi, medeniyet nazariti, j x nazariti, axbarat neshriyat idarisi, milletler komitéti(diniy ishlar idarisi), turalghu we sheher-yéza qurulush nazariti qatarliq alte organning birliship tüzüp chiqqanliqi bildürülgen.