Уйғур аптоном районида аз кәм 13 милйон адәм "кредит системиси" ға киргүзүлгән

Мухбиримиз әркин
2019-01-31
Share

Нөвәттә уйғур аптоном райониниң көп қисим вилайәт, шәһәрлиридә шәхси кредит системисини йолға қоюлуп, аз кәм 13 милйон адәм бу системиға киргүзүлгән.

Хитай ахбарат васитилириниң хәвәр қилишичә, мәзкур системидики кишиләрниң шәхс кредит тарихиға намувапиқ әһваллар хатирилинип қалған болса, уларниң кредит картиси, қәрз пул елиши бирдәк рәт қилинидикән. Нөвәттә мәзкур система уйғур аптоном райониниң қизилсу, қәшқәр, хотән қатарлиқ вилайәт, областлиридин башқа җайларда рәсмий йолға қоюлған.

Хитай ахбарат васитилиридә мәзкур системисиниң хитай һөкүмити йолға қоюшни тәкитләп кәлгән иҗтимаий кредит түзүми билән охшаш яки униңдин пәрқлиқ ноқул банка кредит системиси икәнлики ениқ тилға елинмиған. Хитай һөкүмити илгири "иҗтимаий кредит түзүми" ни йолға қоюп, кишиләрниң күндилик паалийәтлирини хатириләп маңидиғанлиқи, иш-һәрикити намувапиқ кишиләрниң айропилан, пойиз қатарлиқ аммиви қатнаш әслиһәлиригә олтуруши, пул-муамилә, аммиви мулазимәт вә иҗтимаий параванлиқ системилиридин пайдилинишиға чәклимә қоюлидиғанлиқини билдүргән. Бу түзүм кишилик һоқуқ тәшкилатлириниң қаттиқ тәнқидигә учрап кәлгән иди.

"тәңритағ" ториниң хәвиридә ашкарилишичә, даириләр өткән йилниң ахирлириға қәдәр 12 милйон 810 миң адәмни шәхси кредит системиға киргүзүп, үрүмчи, шихәнзә, или, қарамай, турпан қатарлиқ җайлардики 28 банкиға мулазимәт қилиш һоқуқи бәргән. Мәлум болушичә, кишиләр юқириқи җайлардики банкиларниң ториға кирип, өзлириниң шәхси кредит әһвалини тәкшүрәләйдикән.

Хитай даирилириниң нопуси 24 милйонлуқ уйғур аптоном районида бу системини немә үчүн қәшқәр, хотән, қизилсу районлирида йолға қоймиғанлиқи мәлум әмәс. Уйғур кишилик һоқуқ паалийәтчилириниң қияс қилишичә, мәзкур кредит системиси 3 милйондәк нопуси йиғивелиш лагерлирида вә қамақханиларда йетиватқан уйғурларниң кредит карт вә қәрз пул елишини қийинлаштуруп, уларниң иқтисади, иҗтимаий һаятини техиму яман әһвалға чүшүрүп қойидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт