Uyghur aptonom rayonida az kem 13 milyon adem “Krédit sistémisi” gha kirgüzülgen

Muxbirimiz erkin
2019.01.31

Nöwette Uyghur aptonom rayonining köp qisim wilayet, sheherliride shexsi krédit sistémisini yolgha qoyulup, az kem 13 milyon adem bu sistémigha kirgüzülgen.

Xitay axbarat wasitilirining xewer qilishiche, mezkur sistémidiki kishilerning shexs krédit tarixigha namuwapiq ehwallar xatirilinip qalghan bolsa, ularning krédit kartisi, qerz pul élishi birdek ret qilinidiken. Nöwette mezkur sistéma Uyghur aptonom rayonining qizilsu, qeshqer, xoten qatarliq wilayet, oblastliridin bashqa jaylarda resmiy yolgha qoyulghan.

Xitay axbarat wasitiliride mezkur sistémisining xitay hökümiti yolgha qoyushni tekitlep kelgen ijtima'iy krédit tüzümi bilen oxshash yaki uningdin perqliq noqul banka krédit sistémisi ikenliki éniq tilgha élinmighan. Xitay hökümiti ilgiri “Ijtima'iy krédit tüzümi” ni yolgha qoyup, kishilerning kündilik pa'aliyetlirini xatirilep mangidighanliqi, ish-herikiti namuwapiq kishilerning ayropilan, poyiz qatarliq ammiwi qatnash eslihelirige olturushi, pul-mu'amile, ammiwi mulazimet we ijtima'iy parawanliq sistémiliridin paydilinishigha cheklime qoyulidighanliqini bildürgen. Bu tüzüm kishilik hoquq teshkilatlirining qattiq tenqidige uchrap kelgen idi.

“Tengritagh” torining xewiride ashkarilishiche, da'iriler ötken yilning axirlirigha qeder 12 milyon 810 ming ademni shexsi krédit sistémigha kirgüzüp, ürümchi, shixenze, ili, qaramay, turpan qatarliq jaylardiki 28 bankigha mulazimet qilish hoquqi bergen. Melum bolushiche, kishiler yuqiriqi jaylardiki bankilarning torigha kirip, özlirining shexsi krédit ehwalini tekshüreleydiken.

Xitay da'irilirining nopusi 24 milyonluq Uyghur aptonom rayonida bu sistémini néme üchün qeshqer, xoten, qizilsu rayonlirida yolgha qoymighanliqi melum emes. Uyghur kishilik hoquq pa'aliyetchilirining qiyas qilishiche, mezkur krédit sistémisi 3 milyondek nopusi yighiwélish lagérlirida we qamaqxanilarda yétiwatqan Uyghurlarning krédit kart we qerz pul élishini qiyinlashturup, ularning iqtisadi, ijtima'iy hayatini téximu yaman ehwalgha chüshürüp qoyidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.