Xitay hökümiti Uyghur rayonida birlik sep xizmitini kücheytmekchi bolghan

Muxbirimiz jewlan
2022-02-23
Share

Xitaydiki “Shinjang géziti” we “Tengritagh tori” ning xewirige qarighanda, 2-ayning 22-küni ürümchide Uyghur aptonom rayonluq birlik sep bölümi we milliy ishlar komitéti bashliqliri yighini chaqirilghan. Aptonom rayonluq partkomning mu'awin sékrétari jang chünlen bu yighin'gha qatniship, xitay hökümitining milletler-din xizmitige qoyghan yéngi telep we wezipilirini otturigha qoyghan.

Yighinda eslidinla qéliplashqan bir yürüsh milliy, diniy siyasetlerni izchil dawamlashturush qayta tekitlen'gen bolup, yéngi dewrde shi jinping idiyesini hemmige yétekchi qilish, milletlerni ittipaqlashturup bir-birige qoshuwétish, islam dinini xitaychilashturup, sotsiyalistik jem'iyetke toluq maslashturush muhim wezipe qatarida békitilgen. Uningdin bashqa, partiye sirtidiki zatlar, ziyaliylar we chet'eldiki muhajirlar bilen munasiwetni yaxshilap, ularni xitay hakimiyitige mayil qilish pilani otturigha qoyulghan.

Közetküchilerning bildürüshiche, köp millet we étiqadchi xelq toplashqan Uyghur rayoni xitay hökümiti birlik sep bölümining nuqtiliq xizmet rayoni bolup, xitay kompartiyesi bu rayon'gha yumshaq küch ishletmekchi bolsa her da'im birlik sep bölümini qollinidiken. Xitay hökümiti partiyege qaraydighan birlik sep bölümining rolini alahide kücheytip, hökümetke qaraydighan milliy ishlar komitéti we diniy jem'iyetlerni tamamen özining kontrolluqigha alghan bolup, “Kompartiye hemmini bashquridu” dégen méxanizmni toluq emelge ashurghan. Birlik sep bölümi emeliyette xitay kompartiyesining özini küchlendürüsh qorali bolup, her sahediki küchlerni öz etrapigha toplashni meqset qilghan. Xitay hökümiti Uyghur rayonining uzaq muddetlik muqimliqini saqlash üchün bir yaqtin qebih zorawanliq yürgüzse, bir yaqtin birlik sep bölümi arqiliq özining ammiwi asasini kücheytmekchi bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet