Xitay da'iriliri kuchardiki bir türküm Uyghurlarni "Térrorluq" bilen eyiblep qamaqqa höküm qilghan

Muxbirimiz erkin
2014-03-07
Élxet
Pikir
Share
Print

Aqsu ottura sot mehkimisi yéqinda kucharda 9 neper Uyghur üstidin höküm chiqirip, "Térrorluq" teshkilatigha qatnishish, chet'elge qéchip jihad herikitige ishtirak qilishqa urunush, qutratquluq, zorawanliq mezmunidiki widé'olarni körüsh, dégen eyibleshler bilen uzun muddetlik qamaq jazasigha mehkum qilghan.

Sot mehkimisi ötken yili 17‏-yanwar chiqarghan hökümide sulayman isma'il, yasin osman, abduréqip ablet, ghappar hémit, qéyum toxti, turghun ghopur, turdi osman, kérem nur, abdurusul hebibullalarni yuqiriqi "Jinayetler" bilen eyibligen. Sulayman isma'il, yasin osman ikkiylenning her birini 15 yilliq, qalghanlarni 10 yilliqtin qamaqqa buyrughan. Sot mehkimisi yene, sulayman isma'ilning 2006‏-yili abdurusul abdul, yasin abdul qatarliq kishiler bilen birliship, xitayning memliketlik emgek nemunichisi qadir baqigha suyiqest pilanlap, emelge ashuralmighanliqini ilgiri sürgen. Lékin, sotning qararida abdurusul abdul bilen yasin abdulgha qandaq jaza bérilgenliki tilgha élinmighan.

Aqsu ottura sotining qarari xelq'ara jem'iyet xitayni perqliq siyasiy, diniy köz qarashtiki Uyghurlargha térrorluqni bahane qilip, zerbe bérish bilen tenqid qiliwatqan mezgilde chiqirildi. Amérikining yéqinda élan qilghan kishilik hoquq doklatida körsitishiche, xitay térrorluq bilen eyibligen Uyghurlarning uchurini qattiq kontrol qilip kelgechke, bu kishilerning rast térrorluqqa qatniship jazalan'ghanlar yaki erkin pikir qilip ziyankeshlikke uchrighanlar ikenlikini éniqlap chiqish qiyinliship ketken.

Toluq bet