Amérika döletlik radiyo istansisi Uyghur weziyitining yamanlishiwatqanliqi heqqide xewer berdi

Muxbirimiz shöhret hoshur
2018-09-05
Élxet
Pikir
Share
Print

Amérikidiki eng nopuzluq axbarat orunliridin NPR, yeni döletlik radiyo istansisi Uyghur weziyitining yamanlishiwatqanliqi heqqide mexsus xewer berdi.

Mezkur radiyoning meshhur riyasetchi ari shapiro bilen "Wol-strét zhurnili" gézitining muxbiri éwa dow arisida söhbet sheklide bérilgen bu anglitishta aldi bilen Uyghur rayonidiki lagérlar heqqide bériliwatqan xewerlerning qanchilik ünüm peyda qilghanliqi otturigha qoyuldi.

Programmida éwa dow mezkur mesilisining axiri b d t sehnisige chiqqanliqi, xitayning b d t da "Kespiy terbiye orunliri" ni tilgha élish arqiliq lagérlarning mewjutluqini qismen derijide étirap qilishqa mejbur bolghanliqi ilgiri sürüldi.

Programmida xitayning chet'eldiki Uyghurlarghimu qol sunuwatqanliqi we bu qol sunushning yaponiye, yawropa döletliri, hetta amérikigha qeder uzurawatqanliqi, emma muhajirettiki Uyghurlarning lagérlar mesilisini pash qilish üchün emdi ikkilenmey otturigha chüshüshke bashlighanliqi gewdilendürüldi.

Sün'iy hemrah arqiliq tartilghan süretlerdin lagérlarning dawamliq türde quruluwatqan we kéngiyiwatqanliqi eskertilgen mezkur söhbet xatiriside Uyghur rayonida yillardin béri dawam qiliwatqan basturushning yéqinqi ikki yilda néme üchün bundaq keskinleshkenliki soraldi. Muxbir éwa dow Uyghur rayonining emeldari chén chüen'goning ilgiri tibette wezipe ötigenliki, mana mushundaq qattiq tedbirler bilen tibette atalmish "Muqimliq" ni saqlighanliqi, uning shu tejribisining emdilikte Uyghur rayonida siniliwatqanliqini bayan qildi.

NPR Ning we bashqa xelq'ara axbarat wasitilirining ilgiriki xewerliride lagérlar mesilisining yalghuz chén chüen'goningla emes, belki eng asasliqi xitay merkizi hökümitining iradisi bilen qurulghan we dawam qiliwatqanliqi ilgiri sürülgen idi.

Toluq bet