Ройтерс агентлиқи чәт әлләрдики уйғурларниң хитайниң тәшвиқатиниң әксичә аилисидикиләр билән һелиһәм алақә қилалмайватқанлиқини билдүргән

Мухбиримиз ирадә
2021-09-23
Share

Ройтерс агентлиқи 23-сентәбир күни тарқатқан бир хәвиридә, хитай һөкүмитиниң тәшвиқатлириниң әксичә, чәт әлләрдики уйғурларниң өз юртлиридики уруқ-туғқанлиридин хәвәр алалмайватқанлиқини билдүргән.

Мақалидә бу йилниң бешида бейҗиңда өткүзүлгән ахбарат елан қилиш йиғинида уйғур аптоном районлуқ һөкүмәтниң баянатчилири гәрчә юртлиридики туғқанлири билән алақишалмайватқан чәт әлләрдики уйғурларға ярдәм қилидиғанлиқини, уларниң өзлири турушлуқ дөләтләрдики хитай әлчиханлири билән алақә қилиши лазимлиқини тәшвиқ қилған болсиму, бирақ буниң әмәлийәт әмәслики мисаллири билән көрситип берилгән.

Ройтерс агентлиқи хитай һөкүмити тәрипидин 20 йиллиқ қамақ җазасиға һөкүм қилинғанлиқи мәлум болған дохтур гүлшән аббасниң қизи зиба мурат вә 15 йиллиқ қамақ җазасиға һөкүм қилинған "бағдаш" ториниң қурғучиси әкбәр әсәтниң һәдиси рәйһан әсәтни зиярәт қилған болуп, уларниң һәр иккиси өзлириниң америкадики хитай әлчиханиси вә уйғур аптоном районлуқ һөкүмәткә йеқинлирини сүрүштүрүп қайта-қайта язған хәтлириниң җавабсиз қалдурулғанлиқини билдүргән.

Зиба мурат мухбирларға һазирғичә өзлириниң аписи һәққидә алған бирдин-бир рәсмий хәвириниң хитай ташқий ишлар министирлиқи 2020-йили бейҗиңда өткүзүлгән ахбарат елан қилиш йиғинида қилған бир қур сөзи йәни, гүлшән аббасниң "терорлуқ җинайити" вә "җәмийәт тәртипини бузуш" җинайити билән әйибләнгәнлики һәққидики сөзи икәнликини билдүргән.

Ройтерс агентлиқиниң мухбирлири бу йил 5-айда гүлшән аббасниң үрүмчидики туралғусини издәп барған болуп, улар униң өйиниң ишикиниң қара хәтләр билән пичәтләнгәнликини көргән. Диққәт қозғайдиғини шуки, бу печәт үрүмчидин интайин узақтики атуш шәһәрлик сақчи идариси тәрипидин селинған икән.

Рәйһан әсәтниң ройтерс агентлиқиға ейтишичә, униң инисиму ақсудики түрмигә қамалған болуп, униң аилисидикиләрниң әкбәрниң ақсудики түрмигә қамалғанлиқини испатлайдиған учурға еришишигә 4 йил вақит кәткән. Рәйһан әсәт мухбирға: "биз бәк гаңгирап қалдуқ. У немишқа ақсуда болиду?. . . Мениңчә, бу кишиләрни йилтизидин қомуруп ташлап, уларниң роһини техиму қаттиқ бузушни мәқсәт қилған," дегән.

Зиба мурат болса хитайниң чәт әлләрдики уйғур гуваһчиларни "ялғанчи" ға чиқириш үчүн бәзиләрниң уруқ-туғқанлирини екранға чиқирип сөзләткәнликини тилға елип: "гәрчә апамни ундақ һаләттә көрүш йүрикимни ағритсиму, бирақ һеч болмиғанда униң һаятта икәнликини билгән болаттим," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт